काठमाडौं । कोभिड–१९ रोकथाम तथा नियन्त्रणका लागि सरकारले लागू गरेको निषेधाज्ञाको समयमा अग्रपंक्तिमा रहेर समाचार संकलनमा खटिने पत्रकार तथा सञ्चारकर्मीलाई सुरक्षा सामग्री प्रदान गरिएको छ ।
निशानदेवी मिडिया प्रालिले सोमबार विभिन्न सञ्चार माध्यममा आबद्ध ७५ जना सञ्चारकर्मीलाई प्रेस ज्याकेट, मास्क, ग्लोब्स र भाइजर (फेस सिल्ड) प्रदान गरेको हो ।
घ्याल्सुम्दो सेवा संस्था अमेरिकाका पूर्वअध्यक्ष छिरिङ राप्के लामाको पहलमा घ्याल्सुम्दो सेवा संस्था अमेरिकाका अध्यक्ष निमा लामा, महासचिव छोन्जोम लामा, ढोक्प्य किदुग अमेरिकाका सदस्य दावा शेर्पा, सञ्चारकर्मी मुकुन्द सुवेदी, नेपाल आदिवासी जनजाति महासंघ अमेरिकाका अध्यक्ष लोक चेम्जोङ, रघु सुवेदी, नेपाली कांग्रेसका युवा नेताहरु ज्ञानल थापा, शिव ढकाल, टकबहादुर रुवाली र एनआरएनए अमेरिकाका युवा संयोजक विनोद रुवालीले अमेरिकाबाट व्यक्तिगत रुपमा आर्थिक सहयोग पठाएको रकमबाट किनिएको थियो ।
सो अवसरमा नेपाल पत्रकार महासंघका महासचिव रमेश विष्टले व्यक्तिगत सुरक्षा अपनाउँदै आफ्नो दायित्व पूरा गर्न पत्रकार तथा सञ्चारकर्मीलाई आग्रह गर्दै पत्रकारको पेशागत सुरक्षाको माग गर्नुभयो । उहाँले आजसम्म झण्डै १ सय जनाभन्दा बढी सञ्चारकर्मीहरु कोरोना भाइरसबाट संक्रमित भैसकेको उल्लेख गर्दै यस्तो बेलामा जोगिएर काम गर्नुपर्ने धारणा राख्नुभयो ।
यस्तै, रिपोर्टर्स क्लब नेपालका सभापति अध्यक्ष ऋषि धमलाले सञ्चारकर्मीहरु कसैको लहैलहैमा नलगाी सही सूचना प्रवाह गर्ने काममा खटिनुपर्ने बताउनुभयो । उहाँले रिपोर्टर्स क्लब सबै सञ्चारकर्मीहरुको पक्षमा रहेको र सधैं पत्रकारहरुको हित चाहेको विश्वास दिलाउनुभयो ।
निशान न्यूज डटकमका प्रधान सम्पादक तथा नेपाल पत्रका महासंघका केन्द्रीय सदस्य गोपाल बराइलीले कोभिड–१९ को समयमा पनि अग्रपंक्तिमा रहेका जनतालाई सूचना दिने पत्रकारको सुरक्षाको लागि सुरक्षा सामग्री प्रदान गरिएको जानकारी दिनुभयो ।
