काठमाडौँ । दक्षिण एसियाली महिला उद्यमी परिषद नेपाल (एससिडब्लुइसी) ले काठमाडौँका विभिन्न स्थानमा भोका नागरिकलाई निःशुल्क भोजन वितरण गरेको छ । कोरोनाका कारण समस्यामा परेका नागरिकलाई सो संस्थामा आबद्ध महिला उद्यमीहरूले निःशुल्क खाना वितरण गरेका हुन् ।
परिषद्की कार्यसमिति सदस्य निता पौडेलले कोरोना भाइरसका कारण आयस्रोत गुमाएर दुःखमा रहेकाहरूलाई निःशुल्क खाना वितरण गरिएको बताइन् । दैनिक खाद्य वस्तुको अभावमा भोकले पीडित भएकाहरूलाई लक्षित गर्दै काठमाडौँको विभिन्न स्थानमा खाना वितरण भइरहेको उनले जानकारी दिइन् ।
सङ्क्रमणको जोखिमका कारण एकै ठाउँमा भेला हुन नदिएर तयारी खाना वितरण गरी भिडभाड नहुने गरी खान भनिएको छ । कोरोना भाइरस सङ्क्रमणको जोखिम न्यूनीकरणका लागि जारी भएको लकडाउन र त्यसबाट सिर्जना भएको आर्थिक सङ्कटले समस्यामा परेकालाई खाना खुवाइएको उनले बताइन्। भदौ १९ गतेबाट संस्थाले खाना खुवाइरहेको छ ।
आइतबार काठमाडौँको हात्तिगौडामा मानव अधिकारका लागि महिला समूहले पनि दाल चामल र नुन वितरण गरेको छ । कोरोनाले समस्यामा परेका नागरिहरूलाई समूहले खाद्यान्नका सामग्री वितरण गरेको हो ।
