काठमाडौँ । अखिल नेपाल किसान महासङ्घ (अप्फा) सहितका चार किसान सङ्गठनले धानकिसानलाई क्षतिपूर्ति दिन माग गरेका छन् । बेलैमा मल आपूर्ति नगरेको तथा झापालगायत देशैभरिका धानबालीमा सङ्क्रमण भएको भन्दै उनीहरूले क्षतिपूर्ति माग गरेका छन् ।
२०७७ भदौ २० गते प्रेसवक्तव्य जारी गर्दैै उनीहरू यस्तो माग गरेका हुन् । चार किसान सङ्गठनको बैठक भदौ १९ गते बसेको थियो ।
आगामी भदौ २५ गते चार किसान सङ्गठनको बैठक बोलाउने, बागलुङ ढोरपाटनको बाढीपहिरो, किसानका लागि रासायनिक मलको समस्या, काठमाडौँ उपत्यकाको रातो मछिन्द्रनाथ रथयात्रालगायतका विषय समेटिएको प्रेसवक्तव्यमा अगाडि भनिएको छ–
“१. आगामी भाद्र २५ गते नेपालका किसानका समस्याका बारेमा छलफल गर्न एक गुगल बैठक बोलाउने र किसानका राष्ट्रिय तथा अन्तर्राष्ट्रिय समस्याबारेमा चारै किसान सङ्गठनका प्रतिनिधिको छलफल चलाउने र त्यसअनुसार किसान समस्यालाई लिएर आन्दोलन उठाउने तयारी गर्ने बैठकले निर्णय लिएको छ ।
२. बैठकले बागलुङको ढोरपाटन वडा नं. ९ मा बुधवार राति आएको बाढीपहिरोले बगाएर पुरेर धेरै जना बेपत्ता पारेकोमध्ये १४ जनाको शब भेटिएको, अहिलेसम्म ६ जनाको मात्र परिचय खुलेको र अझै ४० जना मानिस बेपत्ता रहेकोमा किसानको ठुलो जनधनको क्षति भएकोप्रति बैठक ठुलो चिन्ता र दुःख व्यक्त गर्दै तिनको उद्धार र बिचल्लीमा परेका परिवारलाई राहत तथा सुरक्षित बसोबासको व्यवस्था मिलाउन बैठकले जोडदार माग गरेको छ । त्यसरी नै यस्ता जोखिमपूर्ण स्थानबाट किसान परिवारलाई समयमै सुरक्षित स्थानमा स्थानान्तरण गरी बसोबास गराउन सुरक्षित जनता आवासको नीतिको तर्जुमा र ठोस रूपमा लागु गर्न पनि बैठकले जोडदार माग गरेको छ ।
३. धानबालीका लागि समयमै आवश्यक मल नपाएर किसान छट्पटाइरहेको, सरकारले रासायनिक मलको साटो जैविक तथा प्राकृतिक मलको विकल्प पनि दिन नसकेको र मल खरिदमा पनि वर्षैपिच्छे ठुलो घोटाला हुने गरेको तथा यस वर्ष मलको अभावमा किसानको धान उत्पादन घट्ने निश्चित भएकाले सरकारले पीडित किसानलाई सरकारले क्षतिपूर्ति देओस् । मल घोटाला र भ्रष्टाचारको छानबिन गरोस् भन्ने पुनः जोडदार माग गरेको छ ।
४. झापालगायतका देशैभरिका जिल्लामा धानखेतीमा गाँज कुहिने र पात पहेँलिने धान धानको गाँज नै मर्ने रोगले किसान पीडित भएको र यसले पनि धानको उत्पादन घट्ने र अनिकाल लाग्ने भएकाले त्यसबारे आवश्यक कदम चालेर धानबालीमा लागेको रोगको उपचार गर्ने र क्षति भएको धानबालीको क्षतिपूर्ति दिने व्यवस्था मिलाउन पनि बैठकले सरकारसँग जोड्दार माग गरेको छ ।
५. बैठकले सरकारको सुझबुझहीनता र अपरिपक्वताले गर्दा मच्छिन्द्रनाथको रथ तान्ने विषय पनि जनता र प्रहरीबिच अनावश्यक झड्प र दमनको विषय बन्यो । चार किसान सङ्गठनको यो बैठकले दमनको तीव्र निन्दा र भत्र्सना गर्दै रथ बिसर्जन गर्ने कार्य सुरक्षित तवरले सम्पन्न गराओस् । यस्ता दमनकारी घटना नदोहोरियोस् भन्ने पनि यो बैठकले विशेष माग गरेको छ ।
६. यसअघि चार किसान सङ्गठनको संयुक्त आयोजनामा वैज्ञानिक, विज्ञ, कृषि तथा अर्थविज्ञ र विभिन्न कृषि व्यवसाय र किसान सङ्गठमा लागेका कृषि अभियन्तासमेत सम्मिलित जुम बैठक गरेर नेपाली किसान र कृषिका समस्याका बारेमा छलफल चलाएर निस्कर्ष निकालेको थियो । अब यस कुरालाई जिल्ला जिल्लासम्म पनि लिएर जाने किसानले भोगिरहेका समस्यालाई लिएर जनचेतना निर्माण र आन्दोलनको विकास गर्ने साझा निष्कर्षका साथ अघि बढ्ने निर्णय लिएको छ ।”
वक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका अध्यक्ष लोकनारायण सुवेदी र अखिल नेपाल प्रगतिशील किसान सङ्घका इन्चार्ज कृष्ण रानाको हस्ताक्षर रहेको छ ।
