काठमाडौँ । जिल्ला प्रशासन कार्यालय ललितपुरले कर्फ्यू आदेश जारी गरेपछि ललितपुर क्षेत्र सुनसान देखिएको छ । बिहिबार रातो मछिन्द्रनाथको रथ तान्ने क्रममा प्रहरी र स्थानीयबिच झड्प भएपछि शुक्रबार ललितपुरको रिङरोड क्षेत्रभित्र कर्फ्यू लगाइएको हो ।
ललितपुर महानगरपालिका क्षेत्रको रिङरोडभित्र कर्फ्यू आदेश जारी भएको छ । आज बिहान ४ देखि राति १० बजेसम्म कर्फ्यू आदेश जारी गरिएको हो ।
हिजो दिउँसो रातो मच्छिन्द्रनाथ रथ तान्न निस्किएको स्थानीयको भिडलाई प्रहरीले रोक्न खोज्दा झड्प भएको थियो । झडपपछि सुरक्षा अधिकारीहरूको बैठकले कोरोना सङ्क्रमणमा भीडभाड बढेको, धार्मिक सहिष्णुतामाथि आँच पुगेको र सङ्क्रामक रोग बढ्ने खतरा बढेको भन्दै कर्फ्यू आदेश जारी गरेको हो ।
अहिले ललितपुर क्षेत्र सुनसान देखिएको छ । त्यहाँ सुरक्षा चेकजाँचमा पनि कडाइ गरिएको छ । त्यसो त उपत्यकाभित्र निषेधाज्ञा जारी नै छ । ललितपुरमा स्थिति नियन्त्रणभन्दा बाहिर गएपछि कर्फ्यू आदेश जारी गरिएको हो । ललितपुर पुरै जिल्ला नभएर बल्खुपुल, मनहरा पुलदेखि महानगरभित्रको चक्रपथ क्षेत्रमा कफ्र्यू लगाइएको हो ।
कर्फ्यूको समयमा भेला, जम्मा, जुलुसलगायत गतिविधि गर्न पाइँदैन । यस्तै कूटनीतिक नियोग, प्रेस, सुरक्षाकर्मी, स्वास्थ्यकर्मी र सरकारी सवारीहरूलाई आवागमनमा कुनै बाधा पर्ने छैन ।
यसैबिच, लामो समयदेखि रोकिएको मछिन्द्रनाथ रथयात्राको आज क्षमापूजा गरिएको छ । ४ महिना लामो लकडाउन र भदौ ३ गतेबाट जारी निषेधाज्ञाका कारण रथयात्रा हुन नसकेपछि सरोकारवालाले आज क्षमा पुजा गरेका हुन् ।
