काठमाडौं । निर्वाचन हारेका नेकपा नेता वामदेव गौतम लगातारको प्रयासपछि ३३ महिना पछि मनोनित कोटाबाट संसद छिर्ने भएका छन् । गौतम २०७४ मंसिरको चुनावमा बर्दिया–१ बाट पराजित भएका थिए ।
सांसद बन्न बारम्बार प्रयास गरेका नेकपा उपाध्यक्ष गौतम मनोनीत कोटामा सांसद बन्ने बाटो पक्का गरेका हुन् ।
प्रधानमन्त्री केपी शर्मा ओलीले बिहीबार बसेको सचिवालय बैठकमा गत फागुन १४ गतेको निर्णय कार्यान्वयन गर्ने बताएसँगै केही दिनमा गौतमले राष्ट्रिय सभाको यात्रा गर्ने निश्चित भएको छ ।
गौतमलाई राष्ट्रिय सभा सदस्य मनोनयनका लागि राष्ट्रपतिसमक्ष सिफारिस गर्न मन्त्रिपरिषद्को बैठक शुक्रबार बस्दै छ । यही बैठक अर्थमन्त्री युवराज खतिवडाका लागि भने अन्तिम हुनेछ ।
राष्ट्रिय सभामा गौतमको आगमन र खतिवडाको वहिर्गमनसँगै सरकार मन्त्रीहरु फेरिने चर्चा पनि चलेको छ । वामदेव गौतमलाई उपप्रधानमन्त्री सहित शक्तिशाली मन्त्रालय दिने र खतिवडालाई प्रधानमन्त्रीका सल्लाहकार बनाउने तयारी भइरहेको बुझिएको छ । यस्तै, सरकारका लगभग सबै मन्त्रीहरु फेरिने बताइएको छ ।
