काठमाडौं । मच्छिन्द्रनाथको रथ तान्ने क्रममा बिहीबार ललितपुरको पुलचोक क्षेत्र दिनभर तनावग्रस्त बनेपछि ललितपुरको चक्रपथ क्षेत्रभित्र स्थानीय प्रशासनले शुक्रबार बिहानैदेखि कर्फ्यु लगाएको छ ।
बिहान ४ बजेदेखि लागू भएको कर्फ्यु आदेश राति १० बजेसम्म कायम रहने जिल्ला प्रशासन कार्यालय ललितपुरले जनाएको छ ।
ललितपुरको चक्रपथ क्षेत्रभित्र मात्रै कर्फ्यु लगाउने निर्णय भएकाले चक्रपथ बाहिर यसअघिकै आदेशअनुसार निषेधाज्ञा कायम रहने पनि प्रशासनले जनाएको छ।
कर्फ्युका कारण बिहानैदेखि ललितपुरको चक्रपथ क्षेत्रमा आवतजावात ठप्प छ भने कुनै पनि पसल खोल्न दिइएको छैन । ललितपुर प्रवेश गर्ने प्रमुख नाकामा प्रहरीको संख्या बढाइएको छ ।
काठमाडौंको थापाथलीबाट ललितपुर प्रवेश गर्ने सडक बागमती पुलमा ट्राफिक प्रहरी बार लगाएर बसेका छन् । दूध र तरकारी बोकेका गाडीलाई पनि ललितपुर प्रवेश गर्न नदिइ फर्काइएको छ ।
प्रशासनको अनुमतिबिनै मच्छिन्द्रनाथको रथ तान्ने क्रममा बिहीबार स्थानीय र प्रहरीबिच झडप हुँदा केही स्थानीय र ४ जना प्रहरी घाइते भएका थिए ।
यसैबीच ट्राफिक प्रहरी जबान कमलप्रसाद घिमिरेलाई कुटपिट गर्ने ९ जनालाई प्रहरीले ललितपुरबाट पक्राउ गरेको छ ।झडपको क्रममा रथ तान्ने समूहले घिमिरेलाई नियन्त्रणमा लिएर बिहीबार निर्घात कुटपिट गरेका थिए ।
नेवार समुदायका विभिन्न संघ संस्थाले पनि अर्को निर्णय नभएसम्म रथ यात्रा नगर्ने निर्णय गरेका छन्।
