बागलुङ । राष्ट्रिय जनमोर्चा बागलुङले जिल्लाको ढोरपाटनमा बाढी पहिरोबाट पीडित जनताको उद्धार एवं राहत कार्यमा जुट्न अपिल गरेको छ ।
बिहीबार विज्ञप्ति प्रकाशित गरी अध्यक्ष अमर बहादुर थापाले पार्टी पंक्तिसहित सम्बन्धित निकायलाई पीडितको तत्काल उद्धार एवं राहत कार्यमा जुट्न आग्रह गर्नुभएको हो ।
बुधबार राति ढोरपाटन नगरपालिकाका विभिन्न क्षेत्रमा पहिरोसँगै आएको बाढीले पु-याएको मानवीय र भौतिक क्षतिले राष्ट्रिय जनमोर्चालाई स्तब्ध बनाएको अध्यक्ष थापाले विज्ञप्तिमार्फत जनाउनुभएको छ ।
यस्तो छ वक्तव्य:
‘२०७७ भाद्र १७ गते साँझबाट परेको अविरल बर्षा र सोही राति करिव ११ः३० बजेबाट ढोरपाटन नगरपालिका वडा नं. ९ सुर्तिवाङको फुर्दुङ क्षेत्र तिर हुँदै भुजिखोलाको सिर देउरालीदेखि पहिरोसँगै आएको बाढीले पु-याएको मानवीय र भौतिक क्षतिले राष्ट्रिय जनमोर्चा, जिल्ला समिति, बागलुङलाई स्तब्ध बनाएको छ ।
यस दुःखको घडिमा मृतकप्रति भावपूर्ण श्रद्धाञ्जली, घाईतेप्रति सिघ्र स्वास्थ्य लाभको कामना र विपद्मा रहनु भएका आफन्तजनमा धैर्य धारणको कामना गर्दछौं । साथै तत्काल उद्धार, व्यवस्थापन र राहतका लागि जुट्न सम्पूर्ण सरोकारवालासँग अपिल गर्दछौं ।
बाढी पहिरोले गर्दा भुजिखोलाको तटकीय क्षेत्रमा रहेका ढोरपाटन नगरपालिका वडा नं. ९,८,७ र ५ लगायत क्षेत्रमा अपूर्णीय क्षति हुन पुग्यो । घटनाबाट क्षति भएको सम्पूर्ण विवरण प्राप्त हुन नसकेको भए पनि लाँकुरीबोट ३ जना, दुवाल ५ जना, घट्टेचौर ५ जना, सिन्द्रुक १ जना, भुसुण्डे ६ जना, घट्टबोट ५ जना, सानो कुक्कु ८ जना, दुनेपधेरा १ जना सहितका अन्य नागरिक बेपत्ता भएका छन् ।
जस मध्ये ११ जनाको मृत शरिर भेटिएको भए पनि बाँकी हराई रहेको अवस्थामा रहेका छन् । त्यहाँ रहेका जनचेतना प्रा.वि. र सरस्वति आधारभुत विद्यालय गरी २ विद्यालय, ६ लघु जलविद्युत र ३ झोलुङ्गे पुल पूर्ण रुपमा क्षति भएका छन । मानव बस्ती आसपास भएर बगेको बाढी भएकाले त्यहाँ रहेका करिव ७५ घर पूर्ण क्षति भएका छन भने अन्य बस्तुभाऊ, खेतियोग्य जमिन, भौतिक संरचना र त्यस खोलाको तटकीय क्षेत्रमा पर्ने सबै स्थानमा अरवौंको क्षति भएको छ ।
यस विपद्मा उद्धारका लागि खट्नु हुने सम्पूर्ण सरकारी निकाय, जनप्रतिनिधी, संघसंस्था, राजनीतिक दल, पत्रकार लगाएत सामाजिक व्यक्तित्वमा पार्टीको तर्फबाट धन्यवाद दिन चाहान्छौं । घटनाबाट घाइते हुनु भएकाको तत्काल उपचार, बेपत्ता व्यक्तिहरुको खोजी र विपद्को व्यवस्थापनका लागि सम्बन्धित निकायले तत्काल कार्यमा तिव्रता दिन माग गर्नुका साथै यस दुःखको घडिमा आवश्यक सम्पूर्ण सहयोग गर्न पार्टीका सबै तहका नेता, कार्यकर्ता र शुभचिन्तकहरुलाई सादर निर्देशन समेत गर्दछौं ।’
