काठमाडौं । ललितपुरको पुल्चोकमा रातो मछिन्द्रनाथको रथ तान्ने समूह र प्रहरीबीच झडप भएको छ । रथ यात्रा सुरु गर्ने क्रममा स्थानीय र प्रहरीबीच झडप हुँदा पुल्चोक क्षेत्र तनावग्रस्त बनेको छ ।
प्रहरीले मानिसहरु भेला हुन र रथ तान्ने कार्यक्रम स्थगित गर्न आग्रह गरेपनि सयौं स्थानीय जम्मा भएर रथ तान्न थालेपछि दुर्वै समूहबीच झडप भएको हो । प्रहरीको आग्रह र अवरोधलाई छल्दै रथलाई तानेर पुल्चोकको मुल सडकमा पुर्याएपछि स्थिति तनावग्रस्त बनेको हो ।
झडपकै क्रममा स्थानीयले प्रहरीको मोटरसाइकलमा आगजनी गरेका छन् । स्थितिलाई नियन्त्रणमा लिन प्रहरीले केही सेल अश्रुग्यास प्रहार गरेको छ भने पानीको फोहोरा पनि हानेको छ ।
निषेधाज्ञा जारी रहेको अवस्थामा नतान्नु भन्दाभन्दै बिहीबार जिल्ला प्रशासनको स्वीकृत विना तानिएकाले रथ तान्न रोक लगाउन प्रहरीले आग्रह गरेको थियो ।
गत वैशाख १८ र १९ गते तान्नुपर्ने रथ कोरोनाको महामारी रोक्नका लागि सरकारले लागू गरेको लकडाउनका कारण रोकिएको थियो । अहिले पनि निषेधाज्ञा बाबजूद स्थानीय जनताको दबाबमा रथ तान्न सुरू गरेका हुन् ।
सरकारले कोभिड १९ रोकथाम तथा नियन्त्रणका लागि कुनैपनि भेला गर्न, चाडपर्व, जात्रा मनाउन निषेध गरेको छ । तर पनि ललितपुरको पाटनका स्थानीयले रातो मच्छिन्द्रनाथको राथजात्राको साइत यस पछि नरहेको भन्दै आज राथजात्रा निकालेका हुन् । रथजात्रा निकाल्नका लागि स्थानीयहरुको भिड लागेको थियो ।
