काठमाडौँ । काठमाडौँ उपत्यकामा पछिल्लो २४ घण्टामा थप ४१५ जनामा कोरोना सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले उपत्यकाका तीन जिल्लामा थप ४१५ जनामा कोरोना भाइरसको सङ्क्रमण पुष्टि भएको जानकारी दिनुभयो ।
प्रवक्ता गौतमका अनुसार उपत्यकाका तीन जिल्लामध्ये काठमाडौँमा ३५०, ललितपुरमा ११ र भक्तपुरमा ५४ जनामा सङ्क्रमण देखिएको हो । केही दिनयता कोरोनाको केन्द्र बन्दै गएको उपत्यकामा बिहीबार ३७७ जनामा कोरोना पुष्टि भएको थियो ।
थप ९२७ मा कोरोना पुष्टि
पछिल्लो २४ घण्टामा नेपालमा थप ९२७ जनामा कोरोना सङ्क्रमण पुष्टि भएको छ। प्रवक्ता गौतमले देशभरमा थप ९२७ जनामा कोरोना भाइरसको सङ्क्रमण पुष्टि भएको बताउनुभयो । प्रवक्ता गौतमका अनुसार नेपालमा आजसम्ममा ३६ हजार ४५६ सङ्क्रमित रहेको र सक्रिय सङ्क्रमितको सङ्ख्या १६ हजार १९ रहेको छ।
आज १० हजार २२९ जनाको पिसिआर विधिबाट नमुना परीक्षण गरिएको थियो । प्रवक्ता गौतमका अनुसार आजसम्मा नेपालमा ६ लाख ५८ हजार ११० जनाको पिसिआर विधिबाट परीक्षण गरिएको छ । त्यस्तै, पछिल्लो २४ घण्टामा थप १६९ जना कोरोना सङ्क्रमित निको भएका छन्। योसँगै कोरोनामुक्त हुनेको सङ्ख्या २० हजार २४२ पुगेको छ ।
थप १२ जनाको मृत्यु, मृतकको संख्या १९५ पुग्यो
कोरोना सङ्क्रमणबाट नेपालमा थप १२ जनाको मृत्यु भएको छ । २४ घण्टामा देशभरमा कोरोना सङ्क्रमणबाट ४ महिला र ८ पुरुष गरी १२ जनाको मृत्यु भएको हो ।
मृत्यु हुने मोरङका ५६ र ६५ वर्षीया, भक्तपुरकी ६४ वर्षीया र मकवानपुरकी ७१ वर्षीया गरी चार महिलाको रहेका छन् । त्यस्तै, उदयपुरका ५२, पर्साका ७२, धनुषाका ४५, सिरहाका ५५, झापाका, ८३, कास्कीका ५२, चितवनका ५१ र रुपन्देहीका ६० वर्षीय गरी ८ पुरुषको निधन भएको प्रवक्ता गौतमले जानकारी दिनुभयो ।
योसँगै नेपालमा कोरोनाबाट मृत्यु हुनेको संख्या १९५ पुगेको छ ।
