काठमाडौं । काठमाडौं उपत्यका प्रवेश गर्ने नाकामा थप कडाई गर्न थालिएको छ । उपत्यकामा जारी भएको निषेधाज्ञाको समय एक साताका लागि थपिएसँगै सुरक्षाकर्मीले उपत्यका प्रवेश गर्ने नाकामा थप कडाई गरेको छ ।
उपत्यकाका तीन वटै जिल्ला प्रशासन कार्यालयहरुले बुधबार निषेधाज्ञाको समय एक साता थप गरी भदौ १७ गते सम्मका लागि निरनतरता दिने निर्णय गरेका छन् । यससँगै उपत्यका प्रवेश गर्ने नाकाहरुमा प्रहरीले चेकजाँचलाई थप कडाई गरेको छ ।
काठमाडौं उपत्यका प्रवेश गर्ने नाकाबाट खाद्यान्न, फलफूल, औषधि, तरकारी, दुग्ध र मासुजन्य सामग्री बोकेका सवारी साधनलाई सहजै प्रवेश गर्न दिइएको छ । त्यसबाहेक एम्बुलेन्स, निर्माण जन्य सामग्री बोेकेका सवारी साधनहरु पनि सोधपुछ गरी उपत्यका प्रवेश गर्न दिइएको छ ।
त्यस्तै अत्यावस्यक कामका लागि आउनेहरुलाई पनि सोधपुछ गरी सम्पर्क विवरण टिपेर प्रवेश गर्न दिएको छ । तर, काठमाडौं प्रवेश गर्ने मानिस तथा सवारी साधनको संख्या भने न्युन छ । नाकामा प्रहरीको संखया भने बढाइएको छ ।
उपत्यका भित्र पनि अत्यावस्यक बाहेकका सवारी साधन सञ्चालनमा रोक लगाइएको छ । मुख्य सडकका चोकचोकमा प्रहरीले चेकजाँचलाई कडाई गरेको छ । अत्यावस्यक सेवाका सवारी साधन भने परिचयपत्रका आधारमा सञ्चालनमा आउन पाएकाछन् ।
काठमाडौं उपत्यकालगायत देशका विभिन्न जिल्लाहरुमा निषेधाज्ञा जारी गरिएको छ । कतिपय जिल्लाका स्थानीय तहहरुमा मात्रै पनि निषेधाज्ञा छ ।
