राष्ट्रिय जनमोर्चाले पश्चिमा साम्राज्यवादीहरुको लगानीमा नेपालमा जातीय सद्भाव विथोल्ने प्रयास भइरहेको जनाएको छ । हालै एक समूहले म्युजिक भिडियो निर्माण गर्ने क्रममा राष्ट्रिय झण्डा जलाउनुका साथै केही जाती विशेषलाई लक्षित गरी घृणा फैलाउने खालको गीत सार्वजनिक गरेको थियो ।
अध्यक्ष चित्रबहादुर केसीले मंगलबार विज्ञप्ति प्रकाशित गरी नेपालको राष्ट्रिय एकता, धार्मिक तथा सामुदायिक सद्भाव र सामाजिक एकतालाई खलबल्याई आफ्ना निहीत उद्देश्य पूरा गर्न चाहने तत्वहरु सक्रिय भएको बताउनुभएको छ । विशेषगरी पश्चिमा साम्राज्यवादी केही देशहरुले यस्ता कार्य गर्ने, गराउने त्यस्ता समूहहरुमाथि लगानी गरेका अध्यक्ष केसीको भनाई छ ।
यस्तो छ वक्तव्य
१) यतिबेला देशमा कोरोना भाइरसको प्रकोप तीब्ररुपमा फैलिरहेको छ । दिनहुँ सयौँको संख्यामा कोरोना संक्रमितहरु थपिँदै गएका छन् । कोरोनाको औषधि वा खोप पत्ता नलगाइसकेको अवस्थामा कोरोना संक्रमणको रोकथामका लागि कैयौँ जिल्ला र पालिकाहरुमा लकडाउन, सिलबन्दी वा निषेधाज्ञा जारी गरिएको छ । पीसीआर परीक्षण, आइसोलेसन, क्वारेन्टिनमा रहन सक्ने क्षमता आदि बढाउँदै लाने प्रयास सरकारले गरेको छ । त्यसलाई हामीले सकारात्मक मान्दछौँ । कोरोना संक्रमण रोकथामको लागि सरकार, सरकारी तथा गैरसरकारी निकाय, संघ, संस्था र आम जनताको सहयोग र समर्थन चाहिन्छ ।
तर केही ठाउँमा कोरोनाको उपचारमा खटिएका चिकित्साकर्मीमाथि दुव्र्यवहार भएको छ । उनीहरुलाई डेरा, होटल तथा टोलमा बस्न नदिने र उनीहरुमाथि दुव्र्यवहार गर्ने कुरा सही होइन । त्यसको हामीले विरोध गर्दछौँ । त्यसप्रकारको व्यवहार गर्नेलाई कारबाही हुनु पर्दछ । स्वास्थ्यकर्मीहरुलाई त्यसप्रकारको व्यवहारबाट रक्षा गर्न र चुनौतीपूर्ण घडीमा पनि उनीहरुको सेवाको कदर गर्दै आवश्यक सुविधा उपलब्ध गराउन पनि हामीले सरकारसँग आग्रह गर्दछौँ । सुरक्षाकर्मीहरुले पनि जोखिमको नजिक रहेर आफ्नो कर्तव्य पालन गरेका छन् । उनीहरुको सेवाको कदर गर्दै जोखिमबाट बच्ने आवश्यक सुविधामा ध्यान दिन सरकारलाई आग्रह गर्दछौँ ।
२) नेपालको राष्ट्रिय झण्डा जलाएको दृष्यसहित खास जाति र सम्प्रदायप्रति द्वैष फैलाउने भिडियो निर्माण गर्ने र मिडियामा राख्ने कार्यलाई हाम्रो पार्टीले सही मान्दैन र त्यसको घोर विरोध र भर्त्सना गर्दछ । सबैलाई थाहा भएकै कुरा हो कि नेपालमा नेपालको राष्ट्रिय एकता, धार्मिक तथा सामुदायिक सद्भाव र सामाजिक एकतालाई खलबल्याई आफ्ना निहीत उद्देश्य पूरा गर्न चाहने तत्वहरु सक्रिय छन् ।
विशेषगरी पश्चिमा साम्राज्यवादी केही देशहरुले यस्ता कार्य गर्ने, गराउने त्यस्ता समूहहरुमाथि लगानी गरेका छन् । त्यस्ता तत्वहरुबाटै त्यसप्रकारको कार्य भएकोमा कुनै शंका छैन । उक्त कार्यमा नेपालको संविधान अनुसार राष्ट्रिय एकता, जातीय तथा सामुदायिक सद्भावका विरुद्ध समेत भएकाले त्यस कार्यमा संलग्न अपराधीहरुलाई कारबाही गर्न जोड दिन्छौँ । यस सन्दर्भमा हामीले सबै राष्ट्रिय एकता, जातीय तथा सामुदायिक सद्भावका पक्षधर शक्तिहरु सचेत, सर्तक र एकताबद्ध हुन अपील गर्दछौँ।’
