काठमाडौं । नेपालमा कोरोना संक्रमितको संख्या ३१ हजार नाघेको छ । पछिल्लो २४ घण्टामा थप ६३४ जनामा कोरोना भाइरसको संक्रमण पुष्टि भएको हो ।
शनिबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमले थप ६३४ जनामा कोरोना पुष्टि भएको जानकारी दिनुभयो ।
प्रवक्ता गौतमका अनुसार अहिले नेपालमा सक्रिय संक्रमितको संख्या १२ हजार ६२१ रहेको छ।
त्यस्तै पछिल्लो २४ घण्टामा नेपालमा थप १३६ जना कोरोना संक्रमित निको भएका छन् । योसँगै कोरोनामुक्त हुनेको संख्या १८ हजार ३५० पुगेको छ ।
थप नौ जनाको मृत्यु
यस्तै, नेपालमा कोरोना भाइरसको संक्रमणबाट थप ९ जनाको मृत्यु भएको छ । प्रवक्ता प्राडा जागेश्वर गौतमले कोरोना संक्रमणबाट थप ९ जनाको मृत्यु भएको जानकारी दिनुभएको हो ।
काठमाडौँ उपत्यकामा थपिए २१६ संक्रमित
पछिल्लो २४ घण्टामा काठमाडौँ उपत्यकमा २१६ जना संक्रमित थपिएका छन् । प्रवक्ता गौतमका अनुसार काठमाडौंमा १६०, भक्तुपुरमा ५० र ललितपुरमा ६ जना कोरोना संक्रमित थपिएका हुन्।
