काठमडौं । नेपालमा कोरोना संक्रमणबाट थप ६ जनाको ज्यान गएको छ । ती मध्ये तीन जनाको काठमाडौंमा र तीन जनाको उपत्यका बाहिर ज्यान गएको हो ।
आज बिहान मात्रै ४ जनाको मृत्यु भएको छ । पाटन अस्पतालमा २ जना र रुपन्देही र चितवनमा गरी २ जना छन् ।
प्युठानका एक कोरोना बिरामीको मृत्यु भएको छ । जिल्लाको स्वर्गद्वारी नगरपालिका वडा नं ७ का ६४ वर्षीयको बुटवलस्थित कोरोना विशेष अस्पतालमा उपचारका क्रममा आज मृत्यु भएको स्वास्थ्य कार्यालय प्युठानका सूचना अधिकारी एवं कोभिड –१९ फोकल पर्सन पुष्कल श्रेष्ठले बताउनुभयो ।
गत साउन २६ गते भारतबाट आएर क्वारेन्टिनमा बसेका उनको कोरोना परीक्षण गर्दा साउन ३२ गते रिपोर्ट पोजेटिभ आएको थियो । सास फेर्न गाह्रो भएको र ज्वरो आएकाले उपचारका लागि यही भदौ १ गते उहाँलाई बुटवल पठाइएको सूचना अधिकारी श्रेष्ठले बताउनुभयो । नी मधुमेह र र रक्तचापका बिरामी थिए ।
यस्तै, ललितपुरस्थित पाटन अस्पतालमा आज बिहान कोरोना संक्रमित दुई जनाको मृत्यु भएको छ । जिल्ला कोभिड–१९ संकट व्यवस्था केन्द्र (ललितपुर) का प्रमुख डाक्टर खगेश्वर गेलालले दिएको जानकारीअनुसार पाटन अस्पतालमा उपचाररत दोलखाकी ३० वर्षीया महिला र सर्लाहीका ४६ वर्षीय पुरुषको आज बिहा मृत्यु भएको हो ।
यस्तै बिहीबार साँझ काठमाडौंको बलम्बुस्थित सशस्त्र प्रहरी अस्पतालमा उपचाररत संक्रमित पुरुषको मृत्यु भएको छ। बलम्बुस्थित सशस्त्र प्रहरी अस्पतालमा उपचाररत बालुवाटारका ७६ वर्षीय व्यक्तिको बिहीबार साँझ मृत्यु भएको हो।
अस्पतालका प्रवक्ता डा प्रविण नेपालका अनुसार अस्पताल भर्ना भएको एक घण्टामै ती पुरुषको मृत्यु भएको हो । उनमा ६ दिनअघि कोरोना संक्रमण पुष्टि भएको थियो । घरमै आइसोलेसनमा बसेका उनी अवस्था गम्भीर भएपछि अस्पताल ल्याइएको थियो । तर उपचारकै क्रममा उनको मृत्यु भउको सशस्त्र अस्पतालले जनाएको छ ।
यसअघि बिहीबार नै कोरोनाबाट काठमाडौं भीमसेनस्थानकी ६५ वर्षीया महिलाको मृत्यु भएको थियो । काठमाडौं मेडिकल कलेजमा उपचारका क्रममा उनको मृत्यु भएको हो ।
यसैगरी विराटनगरमा पनि बिहीबार राति कोरोना संक्रमित एक पुरुषको मृत्यु भएको छ । होम आइसोलेसनमा बसेका विराटनगर महानगरपालिका–६ का ४५ वर्षीय पुरुषको मृत्यु भएको वडाध्यक्ष विजय कामतले जानकारी दिएका छन्।
