काठमाडौं । संघीय संसद सचिवालयले संसदको लोगो विवादित बनेपछि निर्माण गर्ने कार्यालयलाई नै फिर्ता पठाएको छ ।

संसद सचिवालयले बुधबार विज्ञप्ति प्रकाशित गरी वागमती प्रदेश सरकार अन्तर्गतको घरेलु तथा साना उद्योग कार्यालय, ललितपुरलाई लोगो परिमार्जनका लागि फिर्ता पठाइएको जनाएको छ ।

साजसज्जा सम्बन्धी समस्या देखिएपछि मंगलबार नै त्यस कार्यालयमा फिर्ता पठाइएको र सो कार्यालयबाट नेपालको अद्यावधिक नक्सालगायतका विषयमा परिमार्जन गरी उपलब्ध गराउने प्रतिवद्धता व्यक्त गरेको संसद सचिवालयको विज्ञप्तिमा उल्लेख छ ।

सचिवालयले अद्यावधिक नेपालको नक्सा अनुसार संसदका पदाधिकारी तथा सदस्यहरुका लागि ३५० थान संसदको ब्याच पिन तयार गर्ने जिम्मेवारी घरेलु तथा साना उद्योग कार्यालयलाई दिएको थियो ।

तर, सो लोगो भद्धा बनेको, नेपालको नक्सा र झण्डा नै बिगारिएको भन्दै आलोचना भएको थियो।