काठमाडौँ । एभिएम टेबलटेनिस क्लबका रुविन महर्जन र इभाना थापाले नेपाल युथ टेबलटेनिस च्याम्पियनसिपमा स्वर्ण पदक जितेका छन् ।
२०८३ असोज २८ गते सम्पन्न यू–२१ सिङ्गल्सको ब्वाइजमा रसिन र गल्र्समा इभानाले स्वर्ण जितेका हुन् ।
लैनचौरस्थित राष्ट्रिय टेबलटेनिस प्रशिक्षण केन्द्रमा भएको प्रतियोगिताको यू–२१ ब्वाइज सिङ्गल्समा नेपाल प्रहरीका गनन्जय दाहाल दोश्रो तथा भिजन टेबलटेनिस क्लबका समिर खत्री र यल टेबलटेनिसका रिजन शाक्य तेस्रो भए ।
यू–२१ गल्र्स सिङ्गल्समा एभिएमकी वियङ्का राई दोस्रो तथा एभिएमकै आस्मा पहरी र साइरा शाक्य तेस्रो बने ।
नेपाल टेबलटेनिस प्रालिद्वारा आयोजित प्रतियोगिताको यू–१७ ब्वाइज सिङ्गल्समा एभिएमका प्रज्ज्वल भट्टराईले स्वर्ण, यलका रिजन शाक्यले रजत तथा स्ट्याग च्याम्पिन्स टेबलटेनिस क्लबका निश्चल थापा र यलका रिभानमुनि वज्राचार्यले कास्य जिते ।
दुईदिने प्रतियोगितामा विभिन्न छओटा स्पर्धामा प्रतिस्पर्धा भएको थियो । यसअघि यू–१३ र यू–१७ गल्र्स सिङ्गल्समा साइरा शाक्य तथा यू–१३ ब्वाइज सिङ्गल्समा रिभानमुनि वज्राचार्यले स्वर्ण जितेका थिए ।
विजेतालाई राष्ट्रिय खेलकुद परिषद् (राखेप) का सदस्यसचिव रामचरित्र मेहता, शिक्षा तथा खेलकुद मन्त्रालयका प्रमुख सल्लाहकार सिद्धि व्यञ्जनकार, राखेप कार्यकारी समितिकी सदस्य सिक्का सुवाल श्रेष्ठलगायतले पुरस्कृत गरे ।
प्रतियोगिताको कुल पुरस्कार राशि दुई लाख रुपैयाँ रहेको थियो ।
