काठमाडौं । सरकारले करिब चार महिना लामो देशव्यापी लकडाउन खुला गरेपछि कोरोना संक्रमणको दर ह्वात्तै बढेको छ । गत चैत ११ गतेदेखि गरिएको लकडाउन साउन ७ गते खुला गरिएको थियो ।
त्यसयता देशैभरी संक्रमण फैलँदै गएपछि विभिन्न जिल्ला तथा स्थानीय तहहरुले आ–आफ्नो क्षेत्रमा लकडाउन घोषणा गरेका छन् । पछिल्लो समय काठमाडौं उपत्यकामा पनि संक्रमणको दर अत्यधिक बढेपछि उपत्यका स्तरमा लकडाउन लगाउने तयारी गरिएको छ ।
उपत्यकाका तीनवटै जिल्ला प्रशासन कार्यालयले साउन ३० गतेदेखि नै उपत्यकामा हुने सबै खाले भिडभाड नियन्त्रण गर्न आदेश जारी गरेका थिए भने काठमाडौं उपत्यका प्रवेशमा कडाइ गरिएको छ । तर, त्यसले संक्रमणको अवस्था घट्नुको सट्टा बढिरहेको छ । संक्रमण नियन्त्रण नभएपछि लकडाउनको तयारी थालिएको हो ।
ललितपुर जिल्लाका प्रमुख जिल्ला अधिकारी नारायण प्रसाद भट्टले तीनवटै जिल्ला प्रशासन कार्यालय र गृह मन्त्रालयबीच यस विषयमा छलफल भइरहेको जानकारी दिनुभयो ।
‘अहिले नै हामीले कुनै निर्णय गरेका छैनौं’ प्रजिअ भट्टले भन्नुभयो, ‘यस विषयमा तीनवटै जिल्लाका सीडीओसापहरुको गृहमन्त्रालयसँग छलफल चलिरहेको छ ।’
अहिले जसरी संक्रमण बढिरहेको छ, त्यसलाई नियन्त्रण गर्न थप कदम चाल्नुपर्ने आवश्यकता देखिएको प्रजिअ भट्टले बताउनुभयो ।
सोमबारसम्म काठमाडौं उपत्यकामा दुई हजार १३४ जनामा संक्रमण फैलिएको छ ।
यो पनिः उपत्यकामा संक्रमितको संख्या दुई हजारभन्दा बढी
काठमाडौं उपत्यकामा चहलपहलमा थप कडाइ, के-के गर्न पाईदैन?
देशका ७७ मध्ये आधा भन्दा बढी जिल्लाहरुमा जिल्लाब्यापी वा विभिन्न स्थानीय तहमा लकडाउन गरिएको छ । खासगरी शहरी क्षेत्रमा हुने चहलपहल कम गर्न स्थानीय प्रशासनले निषेधाज्ञा घोषणा गरेका छन् ।
प्रदेश २ का अधिकांश जिल्लामा लकडाउन र निषेधाज्ञा घोषणा गरिएको छ भने वीरगन्जमा सेना परिचालन गरिएको छ । यस्तै, चितवन, कास्की, रुपन्देही, कपिलवस्तु, नवलपरासी, बाँके लगायत जिल्लाका अधिकांश स्थानीय तहमा लकडाउन घोषणा गरिएको छ ।
साउन ३० गते ललितपुर जिल्ला प्रशासन कार्यालयद्वारा जारी आदेश
साउन ३० गते ललितपुर जिल्ला प्रशासन कार्यालयद्वारा जारी आदेश
