काठमाडौँ । सङ्घीय संसदका सांसदहरुले अद्यावधिक नक्सानुसार नयाँ डिजाइन गरिएको नयाँ लोगो लगाएका छन् । लोगो भद्दा भएको भन्दै असन्तुष्टि जनाए पनि सांसदहरूले ग्रहण गरेका छन् ।
संसदको लोगो डिजाइन ८७ वर्षे टेकवीर मुखियाले गर्नुभएको हो । मुखियाले बनाएको लोगोको डिजाइनअनुसार लोगो निर्माण भएको देखिदैन् । बागमती प्रदेशअन्तर्गतको घरेलु तथा साना उद्योग कार्यालय ललितपुरलाई लोगो निर्माणको अर्डर दिइएको थियो ।
लोगो निर्माण हुँदा डिजाइनभन्दा केही भिन्न रूपमा तयार भएको पाइएको छ । सांसदहरूले भने लोगोमा रहेको नेपालको नक्सा स्पष्ट नभएको र कलात्मक बनाउन नसकेको बताएका छन् ।
सांसदहरूले लगाउने नयाँ नक्सानुसारको लोगो भद्दा भए पनि स्वदेशी उत्पादनको प्रबर्धन गर्न भए पनि ग्रहण गरिएको प्रतिक्रिया दिएका छन् ।
सामाजिक सञ्जालमा र कतिपय सांसदहरूले नै लोगो डिजाइनमा हेलचेक्र्याइ गरिएको टिप्पणी भइरहे पनि स्वदेशी उत्पादनलाई प्रबर्धन गर्न स्वीकार गरिएको सांसद शशी श्रेष्ठले बताउनुभयो । राज्य व्यवस्था तथा सुशासन समितिका सभापतिसमेत रहनु भएका सांसद श्रेष्ठले लोगोमा नेपालको नक्सालाई कलात्मक बनाउन सकिने भए पनि त्यसो हुन नसकेको बताउनुभयो । स्वदेशी उद्योगलाई प्रबर्धन गर्ने विषय सही भएको तर हातले नै लोगो निर्माण गर्दा पनि फिनिसिङमा ध्यान दिएर बनाउन नसकेको बताउनुभयो ।
यस्तै, सांसद रामकुमारी झाँक्रीले लोगो निर्माण गर्दा फिनिसिङमा ध्यान नदिएकोले भद्दा देखिएको बताउनुभयो । आफूहरूले स्वदेशी उद्योगलाई सधैँ प्रबर्धन गर्न आवाज उठाउँदै आएकाले विरोध गर्न नमिल्ने भन्दै उहाँले घुमाउरो गरी असन्तुष्टि व्यक्त गर्नुभयो ।
