काठमाडौं, असोज १३ । राष्ट्रिय जनमोर्चाले अविरल वर्षा र बाढीपहिरोका कारण देशका विभिन्न भागमा भएको जनधनको क्षतिप्रति दुःख व्यक्त गर्दै पीडितलाई तत्काल राहत उपलब्ध गराउन सरकारसँग माग गरेको छ ।

पार्टीले जलवायु परिवर्तन र पर्यावरणीय असन्तुलनलाई गम्भीर संकटका रूपमा व्याख्या गर्दै जनधनको सुरक्षाका लागि पूर्वतयारी र पर्यावरण संरक्षणका ठोस कदम चाल्न सरकारको ध्यानाकर्षण गराएको छ ।

पार्टीका कार्यवाहक अध्यक्ष रश्मीराज नेपालीले २०८३ असौज १३ गते मंगलबार जारी गरेको प्रेस वक्तव्यमा बाढीपहिरोमा ज्यान गुमाएकाहरूप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरिएको छ । साथै, विपत्तिबाट प्रभावित नागरिकलाई आवश्यक राहतको व्यवस्था मिलाउन सरकारसँग आग्रह गरिएको छ ।

राष्ट्रिय जनमोर्चाले जलवायु परिवर्तनका कारण अत्यधिक गर्मी, अनियमित वर्षा, बाढीपहिरो, हुरीबतास, आँधी र डढेलोजस्ता प्राकृतिक विपत्तिहरू बढ्दै गएको उल्लेख गरेको छ । औद्योगिक राष्ट्रहरूबाट हुने हरितगृह ग्यास उत्सर्जन र विकासका नाममा गरिने अनियन्त्रित तथा विनाशकारी गतिविधिले पर्यावरणीय सन्तुलनमा गम्भीर असर पारिरहेको पार्टीको ठहर छ ।

वक्तव्यको पूर्णपाठ :

“अविरल वर्षा र बाढीका कारणले देशका विभिन्न भागमा भएको जनधनको क्षतिको लागि हामीले गहिरो दुःख प्रकट गर्दछौँ । बाढीपहिरोबाट जीवन गुमाएकाप्रति श्रद्धाञ्जली र सन्तप्त परिवारजनप्रति हार्दिक समवेदना प्रकट गर्दछौँ । यसका साथै बाढीपहिरो पीडितहरूलाई आवश्यक राहतको व्यवस्था मिलाउन हामीले सरकारसँग माग गर्दछौँ ।

जलबायुमा व्यापक परिवर्तन आउन थालेको छ । यसले गर्दा अत्यधिक गर्मी, अनियमित वर्षा, बाढी, पहिरो, हुरीबतास, आँधी, डढेलो जस्ता घटना बढिरहेका छन् । यसबाट प्राणी जगतको अवस्था जोखिम बन्न थालेको छ । औधोगिक राष्ट्रहरूले उत्सर्जन गरेको कार्वनमोनोक्साइडका कारण वायुमण्डलीय वजनतहमा गम्भीर असर पर्दै गएको छ । हरितगृह ग्यासको मात्राले पृथ्वीमा तापक्रममा निरन्तर वृद्धि हुँदै गएको छ । यसले पर्यावरणीय सन्तुलनलाई बिगार्दै लगेको छ ।

जलबायुमा भएको परिवर्तनले सबैभन्दा बढी प्रभावित प्राणी जगत नै हो, जसले ठुलाठुला विपत्तिहरूको सामना गर्नुपरेको अवस्था छ । यस प्रकारको परिस्थिति सिर्जना हुनुमा साम्राज्यवादी मुलुकहरूले पर्यावरणमाथि गरेको अतिक्रमण नै हो । विकासका नाममा भएका अनियन्त्रित र ध्वंसात्मक क्रियाकलापले नै पर्यावरणलाई संकटमा पार्दै लगेका छन् । पर्यावरणमाथिका यस प्रकारका अतिक्रमणहरूले अन्ततः मानवजाति र सम्पूर्ण प्राणी जगतलाई विनाश गरेर लैजाने छन् ।

नेपालले अहिले जलवायु परिवर्तनको गम्भीर समस्या भोगिरहेको छ । भोटेकोशी बाढी त्यसको ज्वलन्त उदाहरणको रुपमा हाम्रो अगाडि खडा छ । त्यो बाढीको क्षतिले पर्यावरण असन्तुलनको भविष्यमा आउने भयानक परिणामको पूर्व संकेतलाई प्रस्तुत गर्दछ । यदि पर्यावरणलाई रक्षा नगर्ने हो भने भविष्यमा कस्तो संकट आउने छ भन्ने कुराको अहिले नै पुर्वानुमान गर्न सकिन्छ ।

हामीले विगत वर्षहरूबाट पर्यावरण संरक्षणका लागि व्यापक आवाज उठाउँदै आएका छौँ । विगतमा नेपालमा भएका चुरे पहाड, चुनढुंगा लगायतमा भएका अतिक्रमणका विरुद्ध हाम्रो पार्टीले व्यापक आवाज उठाएको छ । साम्राज्यवादी मुलुकहरुले प्राणी जगतलाई विनाश गर्ने गरी गरेको कार्वन उत्सर्जनको विरुद्धमा हामीले अन्तर्राष्ट्रिय ऐक्यवद्धता कायम गर्दै सङ्घर्ष गर्दै आएका छौँ र भविष्यमा पनि हाम्रो त्यो संघर्ष निरन्तर रहने छ ।

जलवायु परिवर्तन र पर्यावरणीय असन्तुलन मानवजाति तथा नेपालका लागि गम्भीर संकट बन्दै गएकोले यसको समाधानका लागि पूर्वसतर्कता र समयमै सरकारी पहलकदमी आवश्यक छ । पर्यावरणीय विनाशका लागि साम्राज्यवादी मुलुकहरूको भूमिका मुख्य रहेकोले त्यसका विरुद्ध विश्वव्यापी रूपमा सशक्त आवाज उठाउनुपर्ने आवश्यकता छ । यसका साथै सरकारले पर्यावरणीय संकटबाट जनधनको रक्षा गर्न पूर्वतयारी गर्नुपर्दछ र पर्यावरण संरक्षरणका ठोस कदम उठाउनुपर्ने आवश्यकतामा हामीले जोड दिन चाहन्छौँ ।”

२०८३ असोज १३ गते ।

रश्मीराज नेपाली
कार्यवाहक अध्यक्ष