काठमाडौं । नेपाल कम्युनिष्ट पार्टी (मसाल) ले पत्रकार बलराम बानियाँको मृत्युबारे सत्यतथ्य पत्ता लगाउन माग गरेको छ । सोमबार विज्ञप्ति प्रकाशित गरी प्रवक्ता रामप्रकाश पुरीले बानियाँको मृत्युप्रति दुःख प्रकट गर्दै मृत्यु स्वाभाविक हो वा षडयन्त्रपुर्वक गरिएको हत्या हो, त्यसबारे स्पष्ट हुनुपर्ने बताउनुभएको छ ।
पत्रकार बानियाँको शव साउन २८ गते मकवानपुरको सिस्नेरीस्थित माण्डो जलविद्युत आयोजनामा भेटिएको थियो । काठमाडौंबाट सम्पर्कबिहीन भएको तीन दिनपछि पत्रकार बानियाँ मकवानपुरमा मृत मेटिएका हुन् ।
नेकपा (मसाल) को वक्तव्यमा भनिएको छ, ‘कान्तिपुर दैनिकका सहायक सम्पादक बलराम बानियाँको रहस्यमय मृत्युप्रति हाम्रो पार्टीको गम्भीर ध्यान आकर्षित भएको छ । त्यसरी एउटा पत्रकारको मृत्यु भएकोमा हामीले दुःख प्रकट गर्दछौँ । हामीले उनीप्रति श्रद्धाञ्जली व्यक्त गर्दै उनका परिवारजनप्रति हार्दिक समवेदना प्रकट गर्दछौँ । उनको मृत्यु सामान्य प्रकारको हो वा कुनै षडयन्त्रपूर्ण तरिकाले गरिएको हत्या हो ? त्यस सम्बन्धमा अझै सत्य तथ्य सार्वजनिक भएका छैनन् । उनको मृत्युको तथ्यसत्य पत्ता लगाउनका लागि हामीले सरकारसित माग गर्दछौँ ।’
यो पनिः कान्तिपुरका वरिष्ठ पत्रकार बानियाँको निधन
