धुन्चेबजार । रसुवाबाढीमा रसुवा जिल्लाबाट मात्रै तीन हजार ७१ जना सम्पर्कविकहीन भएका छन् । रसुवाका सहायक प्रमुख जिल्ला अधिकारी सूचना अधिकारी द्रुवप्रसाद अधिकारीले सो जानकारी दिएका हुन् ।
२०८३ भदौ १० गते ल्हेन्दे खोला हुँदै गएको बाढीका कारण हालसम्म जिल्लामा एक हजार तीन सय १३ जनाको जीवितै उद्धार गरिएको छ । अधिकारीका अनुसार बाढीपहिरोको चपेटामा परेका एक हजार दुई सय २७ नेपाली र ८६ विदेशी पर्यटकको सुरक्षाकर्मी तथा स्थानीयको सक्रियतामा उद्धार गरिएको छ ।
बाढीका कारण अलपत्र परेका तथा गोसाइँकुण्ड क्षेत्रमा रोकिएका एक सय ४५ तीर्थयात्री तथा स्थानीयलाई हेलिकप्टरमार्फत नुवाकोट र काठमाडौँतर्फ सुरक्षित स्थानान्तरण गरिएको छ । दुर्गम र सडक सञ्जाल विच्छेद भएका क्षेत्रमा राहत र उद्धारका लागि हेलिकप्टर प्रयोग गरिएको छ ।
बिपद्पछि जिल्लामा सम्पर्कविहीन हुनेहरूको सङ्ख्या ठुलो छ । श्रीनाथ गण, ब्राबल ब्यारेकअन्तर्गतका २७ नेपाली सेना, २८ नेपाल प्रहरी, १३ सशस्त्र प्रहरी, ७९ सरकारी कर्मचारी र २६ जना बैङ्क तथा वित्तीय संस्थाका कर्मचारी अझै सम्पर्कबाहिर छन् ।
त्यस्तै रसुवाका एक हजार तीन सय ७०, अन्य जिल्लाका एक हजार दुई ६२ र दुई सय ६६ विदेशी पर्यटक सम्पर्कविहीन रहेको सहायक प्रजिअ अधिकारीले बताए ।
बिपद्का क्रममा फेला परेका शवमध्ये छ जनाको सनाखत भई आफन्तलाई बुझाइसकिएको छ । उत्तरगया–५ का जनक आचार्य, गङ्गादेवी श्रेष्ठ, पुदुली तामाङ, आशवीर तामाङ र आशिष बानियाँ तथा गोसाइँकुण्ड–६ की छिरिङ ग्याल्मो तामाङको शव सनाखत भएको हो ।
अन्य विभिन्न स्थानमा फेलापरेका एक सय ६३ शवमध्ये पाँच जनाको सनाखत भइसकेको र बाँकीको सनाखत प्रक्रिया तथा डिएनए परीक्षणका लागि मुचुल्का उठाउने कार्य भइरहेको सहायक अधिकारीले बताए ।
बाढीपहिरोले रसुवाको भौतिक संरचनामा ठुलो क्षति पुर्याएको छ । प्रारम्भिक विवरणअनुसार एक हजार ५०० निजी घर पूर्ण वा आंशिक रूपमा क्षतिग्रस्त भएका छन् । त्यस्तै २८ सरकारी तथा सार्वजनिक निकाय, आठोटा सामुदायिक विद्यालय, तीन निजी विद्यालय र १४ बैङ्कका भवनमा क्षति पुगेको छ ।
त्यसैगरी जिल्लाको मेरुदण्ड मानिने ४१ किलोमिटर राजमार्ग तथा सडकखण्ड ठप्प भएको छ । छओटा पक्की मोटरेबल पुल, आठोटा ट्रस तथा बेलीब्रिज, एक आर्च पुल र १० ओटा झोलुङ्गे पुल बाढीले बगाएको वा क्षति पुर्याएको छ । जिल्लाका आठोटा जलविद्युत् आयोजनामा समेत अत्यधिक क्षति पुगेको छ ।
थातथलोबाट विस्थापित भएका सात हजार ३३ नागरिकलाई जिल्लाका विभिन्न १२ सुरक्षित आश्रयस्थलमा राखिएको छ । धुन्चेस्थित सिटी सेन्टर, कोमिन श्यामे वाङ्फेल मावि, गणेश आधारभूत विद्यालयलगायत स्थानमा आश्रित नागरिकलाई गाँसबासको व्यवस्था मिलाइएको छ ।
प्रभावित क्षेत्रमा हालसम्म एक सय ३६ पटक राहत सामग्री वितरण गरिएको छ । बिपद्का बिच पनि जिल्लाको ८३ प्रतिशत जनसङ्ख्यामा विद्युत् सेवा पुन: सञ्चालन गरिएको छ भने नेपाल टेलिकमको सञ्चार सेवा सम्पूर्ण क्षेत्रमा सञ्चालनमा ल्याइएकाले उद्धार र समन्वय कार्यमा सहज भएको छ ।
