धनबिर पुन, नयाँ दिल्ली ।
मूल प्रवाह अखिल भारत नेपाली एकता समाज केन्द्रीय महिला विभागको आयोजनामा ‘नेपालको राजनीतिक आन्दोलनमा प्रवासी महिलाहरुको भूमिका’ विषयक अन्तरक्रिया कार्यक्रम हुने भएको छ । कोरोना भाइरसको संक्रमणका कारण जुमबाट कार्यक्रम गर्न लागिएको मूलप्रवाहले जनाएको छ ।
‘यो वर्षको तिजी कार्यक्रम कोरोना भाइरसको बढ्दो संक्रमण र भारत सरकारले संक्रमण रोकथामको लागि जारि गरेको दिशा निर्देशन अनुसार भारतको केन्द्र एवं राज्य सरकारहरुद्वारा कतिपय स्थानमा सार्वजनिक जमघटमा लगाएको रोक र कतिपय राज्यहरुमा ५० जनाभन्दा बढिको जमघटलाई निषेध गरिएको हुँदा कार्यक्रम आयोजना गर्न कठिनाई पैदा भएकोले अनलाईन कार्यक्रम राख्नु परेको हो’ मूलप्रवाहका अध्यक्ष दुर्गाबहादुर केसीले भन्नु भयो ।
अन्तरक्रिया कार्यक्रम १५ अगस्त (शनिबार) हुनेछ । कार्यक्रममा राष्ट्रिय जनमोर्चाकी उपाध्यक्ष तथा प्रवक्ता एवं प्युठानबाट राष्ट्रिय जनमोर्चाको तर्फबाट निर्वाचित संघीय सांसद दुर्गा पौडेलको प्रमुख आतित्थ्यतामा हुनेछ ।
यस्तै, अखिल नेपाल महिला संघ केन्द्रीय अध्यक्ष तथा राष्ट्रिय जनमोर्चाकी पूर्व सांसद मिना पुनलगायत विभिन्न अतिथिहरुले पनि आ–आफ्ना विचार राख्नु हुने अध्यक्ष केसीले जानकारी दिनु भयो ।
