सुनसरी । चार महिनाअघि एकता गरेको श्रम संस्कृति पार्टीमा आन्तरिक असन्तुष्टि बढेको छ। अध्यक्ष हर्क साम्पाङले सुदन किराँती समूहलाई केन्द्रीय समिति बैठकमा औपचारिक रूपमा नबोलाएपछि दुई पक्षबीच दूरी बढेको हो।
किराँती समूहले पछिल्लो अवस्थाबारे छलफल गर्न छुट्टै भेला बोलाउने तयारी गरेको छ। एकताका क्रममा किराँती समूहबाट एक उपाध्यक्ष, एक सचिव र १५ केन्द्रीय सदस्यसहित १८ जना श्रम संस्कृति पार्टीमा समाहित भएका थिए। त्यसपछि पार्टीको केन्द्रीय समिति २३ बाट ४१ सदस्यीय बनेको थियो।
किराँती पक्षले अध्यक्ष साम्पाङको फेसबुक केन्द्रित गतिविधि तथा पार्टी सञ्चालनमा छलफल र परामर्शको अभावप्रति असन्तुष्टि जनाएको छ। उनीहरूले समस्या सैद्धान्तिक मतभेदभन्दा नेतृत्वको कार्यशैलीसँग जोडिएको बताएका छन्।
यद्यपि किराँती समूह तत्काल पार्टी विभाजनको पक्षमा नरहेको र एकता जोगाउन प्रयास गर्ने जनाएको छ। दुई पक्षबीच बढ्दो असन्तुष्टिले आगामी दिनमा पार्टीको संगठनात्मक संरचना र नेतृत्वमा प्रभाव पार्न सक्ने देखिएको छ।
