बाढीपहिरोले सडक–पुल बगाएपछि गाउँपालिका पूर्ण रूपमा सम्पर्कविहीन, १६५ जना बेपत्ता

Advertisement

काठमाडौँ, भदौ १५ । बाढीपहिरोका कारण रसुवाको आमाछोदिङमो गाउँपालिका देशका अन्य भूभागबाट पूर्ण रूपमा विच्छेद भएको छ। भोटेकोशी र ल्हेन्दे खोलामा आएको विनाशकारी बाढी तथा पहिरोले सडक, पैदलमार्ग र झोलुङ्गे पुल बगाएपछि गाउँपालिकाको आवागमन ठप्प भएको हो।

गाउँपालिका अध्यक्ष बुचुङ तामाङका अनुसार प्रारम्भिक विवरणमा कम्तीमा १६५ जना सम्पर्कविहीन छन्। सञ्चार र विद्युत् सेवा अवरुद्ध रहेकाले क्षतिको यकिन विवरण आउन नसकेको र सम्पर्कविहीनको संख्या करिब २०० पुग्न सक्ने अनुमान गरिएको छ।

यातायात अवरुद्ध भएपछि गाउँपालिकामा खाद्यान्न संकट गहिरिँदै गएको छ। स्थानीयवासीले घरमा सञ्चित अन्नपात बाँडेर गुजारा गरिरहेका छन्। आगामी दुई–तीन दिनभित्र सडक वा हवाईमार्गबाट खाद्यान्न आपूर्ति हुन नसके चरम भोकमरीको अवस्था आउन सक्ने अध्यक्ष तामाङले चेतावनी दिएका छन्।

बाढीपहिरोबाट करिब ११५ घरधुरी विस्थापित भएका छन्। विस्थापित परिवारहरू सुरक्षित स्थानमा आफन्त तथा छिमेकीको आश्रयमा बसिरहेका छन्। गाउँपालिकाले खाद्यान्न, अस्थायी आवास, लत्ताकपडा तथा वैकल्पिक ऊर्जा उपकरण तत्काल आवश्यक रहेको जनाएको छ।

नेपाली सेना, सशस्त्र प्रहरी र नेपाल प्रहरीले हवाई उद्धार तथा राहत वितरण गरिरहे पनि स्थानीय सरकारसँग पर्याप्त समन्वय हुन नसकेको अध्यक्ष तामाङको गुनासो छ। विद्युत् अभावका कारण स्वास्थ्य केन्द्रमा रहेका अक्सिजन कन्सन्ट्रेटर सञ्चालन हुन नसक्दा बिरामीको अवस्था समेत जोखिमपूर्ण बनेको छ।