काठमाडौँ । बुधवार बिहान रसुवाको भोटेकोशीमा आएको भीषण बाढीका कारण छओटा जलविद्युत आयोजनामा ठुलो क्षति हुँदा विद्युत् आपूर्ति अवरुद्ध भएको छ ।
बाढीबाट रसुवागढी, चिलिमे, त्रिशूली ३ ‘ए’, त्रिशूली ‘बी’ हब सबस्टेसन, त्रिशूली र देवीघाट जलविद्युत केन्द्रलगायतका ठुला जलविद्युत केन्द्र तथा सबस्टेसनमा क्षति पुगेको हो ।
नेपाल विद्युत् प्राधिकरणका अनुसार बाढीले उत्पादन, प्रसारण र वितरण प्रणालीमा क्षति पुर्याएपछि सो क्षेत्रको विद्युत् आपूर्ति पूर्ण रूपमा अवरुद्ध भएको छ ।
बाढीले जलविद्युत संरचनाका अतिरिक्त घर, सडक, पुल तथा अन्य भौतिक पूर्वाधारमा समेत अपूरणीय क्षति पुर्याएको छ ।
प्राधिकरणले विद्युत् आपूर्ति यथाशक्य चाँडो नियमित गर्न हरसम्भव प्रयास भइरहेको जनाउँदै आपूर्ति सहज नहुञ्जेल धैर्य रहन आग्रह गरेको छ ।
बाढीको जोखिम अझै कायम रहेकाले तटीय क्षेत्र र जोखिमयुक्त स्थानमा रहेका कर्मचारी तथा सर्वसाधारणलाई उच्च सतर्कता अपनाउन र सुरक्षित स्थानमा सर्न अपिल गरिएको छ ।
प्रभावित क्षेत्रमा उद्धार, राहत र बेपत्ताको खोजीका लागि सबै पक्षलाई तत्काल प्रभावकारी रूपमा परिचालन हुन पनि प्राधिकरणले आग्रह गरेको छ ।
