काठमाडौं । गोंगबु हत्या प्रकरणमा प्रहरीले आमा छोरीलाई पक्राउ गरी सार्वजनिक गरेको छ । काठमाडौं महानगरीय प्रहरी परिसरले हत्या आरोपमा चितवनकी ३७ वर्षीया कल्पना मुडभरी र उनकी १५ वर्षीया छोरीलाई मंगलबार सार्वजनिक गरेको हो।

गत आइतबार दाङका कृष्णबहादुर बोहोराको हत्या गरिएको कोठामा डेरा गरी बस्ने कल्पना र उनकी १५ वर्षीया छोरीलाई चितवनबाट पक्राउ गरेको प्रहरीले जनाएको छ । प्रहरीको टोलीले चितवन टाँडीस्थित माधवपुरबाट कल्पनासहित उनका दुई नाबलक छोराछोरीलाई काठमाडौं ल्याएको जनाएको छ ।

चितवन घर भएकी मुडभरी काठमाडौंमा छोरी र छोरासँगै बस्दै आएकी थिइन् । कल्पनाको श्रीमान भने विदेश गएको प्रारम्भिक अनुसन्धानमा खुलेको छ ।

कल्पनाले हत्या स्विकार गरिसकेकी छिन् । प्रहरीको अनुसन्धानले हत्या लेनदेन र यौनसँग जोडिएको देखाएको छ । कल्पनाकी छोरीले शव व्यवस्थापन गर्न सहयोग गरेको खुलेको छ ।

शनिवार बोहरा कल्पनाको गोंगबुमा रहेको डेरामा पुगेका थिए । कोठामा पुगेको केही समयमा उनीहरुबीच विवाद भएपछि हत्या भएको देखिएको छ । कल्पनाको डेरामा पुगेपछि दही, चिउरा र मासु खुवाएको देखिएको छ ।

त्यसपछि स्लिपिङ ट्याब्लेट खुवाएर सुताएको देखिएको प्रहरीले जनाएको छ । लगत्तै सलले घाँटी बाँधेर काटेको देखिएको प्रहरीले जनाएको छ ।

बोहराले सामाजिक सञ्जालमामा फेक आइडी बनाएर बदनाम गराउन खोजेपछि हत्या गरिएको प्रारम्भिक अनुसन्धानमा खुलेको महनगरीय प्रहरीले जनाएको छ । बोहरा र कल्पनाको तीन चार वर्षअघि देखि नै सामाजिक सञ्जाल फेसबुकमा चिनजान भएको देखिएको छ ।

आइतवार काठमाडौंको गोंगबु गणेशस्थान नजिकैको नवज्योति मार्गमा कालोरंगको सुटकेसभित्र टाउको र खुट्टा काटिएको शव फेला परेको थियो । त्यसको करिब ३ सय मिटरमा झोलाभित्र खुट्टा र टाउको फेला परेको थियो ।

बोहराको हत्या गरेपछि कोठामा रहेको खुर्पाले काटेर सुटकेसमा हालेर फ्याँलेको बयान दिएकी छिन् । हत्या गरेपछि बिहानै उनी चितवन गएको देखिएको छ । एम्बुलेन्स प्रयोग गरेर कल्पना चितवन पुगेकी थिइन् ।