काठमाडौं । मेडिकल कलेज कोहलपुरमा एक व्यक्तिको कोरोनाका कारण मृत्यु भएको छ । अछाम चौरपाटी निवासी ५० वर्षीय पुरुषको सोमबार मृत्यु भएको प्रमुख जिल्ला अधिकारी रामबहादुर कुरुवाङले जानकारी दिनुभयो ।
यस्तै, जनकपुरमा पनि कोरोना संक्रमणबाट थप एक जनाको मृत्यु भएको छ । प्रादेशिक अस्पताल जनकपुरको आइसोलेशनमा भर्ना भएका धनुषा विदेह नगरपालिका ८ का ६० वर्षीय पुरुषको कोरोना संक्रमणबाट मृत्यु भएको हो ।
साउन ८ गते उपचारका लागि अस्पताल आएका क्षयरोगी उनको पीसीआर रिपोर्ट पोजेटिभ आएपछि आइसोलेशनमा भर्ना गरिएको थियो ।
उनको सोमबार राति मृत्यु भएको प्रादेशिक अस्पतालका निमित प्रमुख एवं आइसोलेशन इन्चार्ज डा. जामुन सिंहले जानकारी दिनुभयो ।
यससँगै नेपालमा कोरोना संक्रमणका कारण मृत्यु हुनेको संख्या ८१ पुगेको छ ।
यता, पर्सा र बारामा गरी थप ७० जनामा कोरोना भाइरसको संक्रमण पुष्टि भएको छ । पर्साको वीरगन्जस्थित नारायणी उपक्षेत्रीय अस्पतालको प्रयोगशालाबाट सोमबार राति आएको रिपोर्टअनुसार पर्साका ६६ र बाराका ४ जनामा कोरोना संक्रमण पाइएको हो ।
