काठमाडौं । नेपाल शिक्षक महासंघले शिक्षकका पेसागत हकहित, शैक्षिक सुधार र विद्यालय शिक्षासँग सम्बन्धित मागलाई लिएर आगामी भदौदेखि आन्दोलन गर्ने निर्णय गरेको छ।

महासंघको तेस्रो राष्ट्रिय परिषद् बैठकले विगतमा सरकारसँग भएका सहमति कार्यान्वयनसहित शिक्षकका नयाँ तथा समसामयिक समस्या समेटेर आन्दोलन अघि बढाउने निर्णय गरेको हो।

शुक्रबार पत्रकार सम्मेलनमार्फत महासंघले बैठकका १५ बुँदे निर्णय सार्वजनिक गरेको छ। आन्दोलनको मिति, स्वरूप र कार्यक्रम तय गर्ने जिम्मेवारी विस्तारित कार्यदल बैठकलाई दिइएको महासंघले जनाएको छ।

महासंघका अध्यक्ष लक्ष्मीकिशोर सुवेदीका अनुसार शिक्षकका पेसागत समस्या, शिक्षा क्षेत्रमा देखिएका चुनौती र पेसागत सुरक्षाका विषय आन्दोलनका प्रमुख एजेन्डा हुनेछन्। आन्दोलनको विस्तृत कार्यक्रम कार्यदल बैठकपछि सार्वजनिक गरिने बताइएको छ।