काठमाडौँ । भरी अर्थात् १४ दशमलव दुई किलोग्रामको सिलिन्डर बजारमा पठाए पनि अस्वाभाविक माग आएकाले ग्याँस अभाव भएको दाबी गरिएको छ ।
नेपाल आयल निगमका अनुसार जगेडामा पर्याप्त ग्याँस भए पनि अस्वाभाविक मागका कारण सो स्थिति देखा परेको हो ।
निगमका प्रवक्ता मनोजकुमार ठाकुरका अनुसार अहिले बजारको समस्या आपूर्ति कम भएर नभई माग अस्वाभाविक रूपमा बढ्दा उत्पन्न भएको हो ।
आयल निगमले बजारमा भरी ग्याँस बजारमा पठाउन थालेसँगै यो समस्या आएको बताएको छ । आधा अर्थात् सात दशमलव पाँच किलोग्राम सिलिन्डर पठाइरहेको ठाउँमा एकैपटक सबैले भरी सिन्डर खोजेकाले समस्या देखिएको हो ।
नेपालमा ग्याँसको माग सरदर मासिक ४५ देखि ४६ हजार मेट्रिक टन छ । अघिल्ला महिनामा ३२ देखि ३८ हजार मेट्रिक टनले बजार धानिरहेको अवस्थामा पछिल्लो महिना ४५ हजार मेट्रिकटन ग्यास आपूर्ति हुँदा पनि अभाव देखिएको पाइन्छ ।
निगमले चैतमा ३८ हजार मेट्रिक टन ग्याँस खपत हुँदा वैशाख र जेठमा क्रमश: ३२ हजार र ३२ हजार मेट्रिक टन मात्र खपत भएको छ ।
‘साँच्चै अभाव नै हुन्थ्यो भने अघिल्ला महिनामा किन भएन ?’ प्रतिप्रश्न गर्दै ठाकुरले भने– ‘बजारमा भरी सिन्डर ग्याँस पठाउन थालेपछि देशैभर एकैपटक सबैले ग्याँस भर्न खोजेपछि समस्या आएको हो ।
निगमले आपूर्तिकर्ता इन्डियन आयल कर्पोरेसन (आइओसी) सँग वर्षभरि आयात गर्ने पेट्रोलियम पदार्थ (ग्याँस) का लागि माग गरेको हुन्छ ।
सरदर मासिक ४५ हजार मेट्रिकटन ग्याँसका लागि डिमान्ड रहने गरेकोमा केही महिना कम हुँदा अर्को महिना मिलाएर पठाउने गर्छ तर एकै महिना ठुलो परिमाणमा ग्याँसको माग बढाउन नसकिने ठाकुरको भनाइ छ ।