बुटवल, साउन १७ — पश्चिम नवलपरासीको सुस्ता क्षेत्रमा भारतीय सशस्त्र सीमा बल (एसएसबी) नेपाली भूमिमा प्रवेश गरी निर्माणाधीन अस्थायी बाँध भत्काएको आरोपपछि सीमा क्षेत्रमा तनाव उत्पन्न भएको छ।
स्थानीयका अनुसार आइतबार दिउँसो करिब ३:३० बजे सादा पोसाक र हतियारसहित करिब ७५ जना भारतीय एसएसबीका सुरक्षाकर्मी सुस्ता गाउँपालिका–५ स्थित थारु टोल क्षेत्रमा प्रवेश गरेका थिए। उनीहरूले निर्माणाधीन १३२ मिटर लामो माटोको अस्थायी बाँध भत्काइदिएको स्थानीयवासीले बताएका छन्।
सुस्ता बचाउ युवा अभियानका संयोजक योगेन्द्र गौतमका अनुसार भारतीय सुरक्षाकर्मी दुई देशको सीमा संकेत मानिने सिमलको रुखबाट करिब ३०० मिटर नेपालतर्फ प्रवेश गरी बाँध भत्काएका हुन्। स्थानीयले विरोध जनाए पनि हतियारसहित आएका सुरक्षाकर्मीका कारण उनीहरूलाई रोक्न नसकिएको उनले बताए।
स्थानीयका अनुसार यो पहिलो घटना भने होइन। गत असारमा पनि भारतीय सुरक्षाकर्मी सुस्ता क्षेत्रमा प्रवेश गरी बाँध निर्माण रोक्न दबाब दिएपछि काम केही समयका लागि स्थगित भएको थियो।
स्थानीय मुन्ना खाँका अनुसार सीमा स्तम्भको अभाव, नारायणी नदीले समय–समयमा धार परिवर्तन गर्नु तथा भारतीय पक्षबाट हुने हस्तक्षेपका कारण सुस्ता क्षेत्रमा सीमा विवाद बारम्बार दोहोरिने गरेको छ।
घटनापछि सम्भावित अप्रिय अवस्था हुन नदिन नेपालको सशस्त्र प्रहरी बल (एपीएफ) घटनास्थलमा परिचालन गरिएको छ। अहिले सुरक्षा सतर्कता बढाइएको छ भने घटनाबारे थप जानकारी संकलन भइरहेको जनाइएको छ।
सुस्ता नेपाल–भारतबीच लामो समयदेखि विवादित सीमा क्षेत्रका रूपमा परिचित छ। सीमा व्यवस्थापन, नदीको धार परिवर्तन र भू–क्षेत्रको दाबीसम्बन्धी विषयमा यसअघि पनि पटक–पटक विवाद उत्पन्न हुँदै आएको छ।