काठमाडौँ, साउन १४ । राष्ट्रिय जनमोर्चाले सुनसरीको देवानगञ्ज गाउँपालिका–३, कप्तानगञ्जमा भएको घटनाको नैतिक रुपमा सरकार जिम्मेवार हुनुपर्ने बताएको छ ।
घटना नियन्त्रणका क्रममा सरकारले अनावश्यक बल प्रयोग गरेर अवस्था थप तनावपूर्ण बनाएको आरोप लगाउँदै जनमोर्चाले त्यसको नैतिक जिम्मेवारी सरकारले लिनुपर्ने जनाएको छ । साउन १४ गते कार्यवाहक अध्यक्ष रश्मीराज नेपालीद्वारा जारी वक्तव्यमा घटनाको समाधान वार्ता र संवादमार्फत खोजिनुपर्नेमा जोड दिइएको छ।
जनमोर्चाले वक्तव्यमार्फत स्थानीय घटनालाई आधार बनाएर पूर्वी तराईमा राजनीतिक र साम्प्रदायिक तनाव सिर्जना गर्ने प्रयास भइरहेको दाबी गर्दै त्यस्ता गतिविधिप्रति सचेत रहन आग्रह गरेको छ । ॅधर्मलाई राजनीतिक उद्देश्यका लागि प्रयोग गर्ने प्रवृत्तिको विरोध गर्दै सरकार, राजनीतिक दल र स्थानीय समुदायबीच एकता आवश्यक रहेको छ ।’
पार्टीले पूर्वी तराईमा केही भारतीय हिन्दूवादी संगठनहरूको गतिविधि र बाह्य हस्तक्षेपप्रति पनि चिन्ता व्यक्त गरेको छ । साथै वक्तव्यमा पार्टीले उक्त घटनालाई दुःखद भन्दै धार्मिक सद्भाव, सहिष्णुता र राष्ट्रिय एकता कायम राख्न सबै पक्षसँग अपिल गरिएको छ ।
वक्तव्यमा लेखिएको छ :
कप्तानगञ्जमा घटेको स्थानीय घटनालाई आधार बनाएर पूर्वी तराईमा त्यसलाई राजनीतिक रङ्ग दिने षड्यन्त्र पनि भइरहेको छ । त्यस प्रकारका कृयाकलापप्रति सम्पूर्ण धर्मावलम्बीहरू सचेत र सतर्क हुनु पर्ने आवश्यकतामा हाम्रो पार्टीले जोड दिन्छ । धर्म संस्कृति आ–आफ्नो आस्थाको विषय हो । तर धर्मलाई उपयोग गरेर आफ्नो प्रतिगामी राजनीतिक उद्देश्य प्राप्त गर्नका लागि गरिने षड्यन्त्रलाई सही मान्न सकिन्न । त्यस प्रकारका कृयाकलापका विरुद्ध सरकार, दल तथा स्थानीय जनताका बिचको एकतामा जोड दिन्छौँ ।
पूर्वी तराईमा लामो समयदेखि योजनाबद्ध ढङ्गबाट भारतीय जनता पार्टी र भारतीय सरकारले राष्ट्रिय स्वयंसेवक दल, बजरङ्ग दल, हिन्दू स्वयंसेवक संगठन, हिन्दू सेना लगायतका धार्मिक संगठनहरू तिब्र रूपमा खोल्ने र तिनीहरूलाई आर्थिक लगानी समेत गर्दै आएको छ । धर्मलाई राजनीतिक रूप दिएर साम्प्रादायिक विखण्डनको स्थिति पैदा गर्ने उद्देश्यद्वारा भारतीय पक्षले यस प्रकारको गतिविधि गरिरहेको छ । भारतको आडमा तराईका अतिवादीहरूले अल्पसंख्यक मुश्लिमहरूलाई निशाना बनाउँदै आएका छन् । मुश्लिमसँगको द्वन्द सृजना गरेर त्यसलाई राजनीतिक रूप दिने षड्यन्त्र पनि गर्दै आएका छन् । कप्तानगञ्जमा घटेको घटना र उक्त घटनाको प्रतिक्रिया स्वरुप तराईका अन्य जिल्लाहरूमा देखिएका गतिविधिहरू त्यसैको परिणाम हो ।
नेपालमा अमेरिकी साम्राज्यवादले पनि धार्मिक आस्थालाई प्रयोग गरेर आफ्नो साम्राज्यवादी राजनीतिक उद्देश्य प्राप्त गर्नका लागि लामो समयदेखि षड्यन्त्र गर्दै आएको छ । पूर्वी पहाडमा देखिएको जातिवादी कृयाकलाप त्यसैको परिणाम हो । त्यसका साथै तराईमा सञ्चालित मदरसाहरूलाई शैक्षिक संस्थाको रूपमा विकास गरिनु पर्दछ । त्यसको आडमा भइरहेका अवाञ्छित गतिविधि वा रोहिङ्गा मुश्लिमहरूको घुसपैठ आदि पनि सुनसरी घटना घट्नमा जिम्मेवार छन् ।
सुनसरी कप्तानगञ्जको घटनालाई साम्य पार्न दुईटा पक्षका बिच वार्ताको माध्यमद्वारा समस्या समाधान गर्नुको सट्टा सरकारले अनावश्यक बल प्रयोग गरेर स्थितिलाई उत्तेजक बनाउने काम गरेको छ । जसको परिणाम दुईटा सम्प्रदायका बिच स्थिति साम्य हुने भन्दा झन् बिग्रेर गएको छ । स्थानीय घटनामा अनावश्यक बल प्रयोग गर्नका लागि देशका गृहमन्त्री नै जिम्मेवार छन् । बिगतका अन्य घटनाहरूमा अपनाइएको नीतिलाई आधार बनाउँदा उक्त घटनामा बल प्रयोगका लागि बालेन नेतृत्वको सरकार र उक्त सरकारका गृहमन्त्री नैतिक रूपले जिम्मेवार भएकोले तिनीहरूले लिएर राजीनामा दिनु पर्ने आवश्यकता छैन ? यो गम्भीर रूपले विचारणीय प्रश्न हो ।”
२०८३ साउन १४ गते ।
