काठमाडौँ, साउन १४ । अखिल नेपाल युवक संघले सुनसरी जिल्लाको देवानगञ्ज गाउँपालिका–३, कप्तानगञ्जमा भएको हिंसात्मक घटनाको नैतिक तथा राजनीतिक जिम्मेवारी वर्तमान सरकारले लिनुपर्ने ठहर गर्दै प्रधानमन्त्री बालेन्द्र शाह र गृहमन्त्री सुदन गुरुङको तत्काल राजीनामा माग गरेको छ।
संघका अध्यक्ष गणेश अधिकारीले बुधबार जारी गरेको प्रेस वक्तव्यमा उक्त घटनामा एक नागरिकको मृत्यु, सर्वसाधारण तथा सुरक्षाकर्मी घाइते हुनु तथा स्थानीय क्षेत्रमा त्रास र असुरक्षाको वातावरण सिर्जना हुनु दुःखद र चिन्ताजनक भएको उल्लेख गरिएको छ । संघले मृतकप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना र घाइतेहरूको शीघ्र स्वास्थ्यलाभको कामना गरेको छ ।
वक्तव्यमा सुनसरीको घटना आकस्मिक नभई पछिल्लो समय विशेषगरी तराई क्षेत्रमा बढ्दै गएको धार्मिक अतिवाद, साम्प्रदायिक उत्तेजना, बाह्य शक्तिको प्रभाव तथा सामाजिक सद्भाव बिथोल्ने गतिविधिको परिणाम भएको दाबी गरिएको छ । यस्ता संवेदनशील विषयमा सरकारले समयमै आवश्यक राजनीतिक, प्रशासनिक र सुरक्षा संयन्त्र परिचालन गर्न नसक्दा परिस्थिति जटिल बनेको संघको भनाइ छ ।
संघले घटनाका क्रममा सुरक्षा निकायबाट भएको बल प्रयोगमाथि पनि प्रश्न उठाएको छ । सामान्य तनावलाई संवाद, संयम र कानुनी प्रक्रियाबाट समाधान गर्नुपर्ने अवस्थामा बल प्रयोग भएको तथा उक्त बल प्रयोग आवश्यक, वैधानिक र समानुपातिक थियो वा थिएन भन्ने विषय स्वतन्त्र, निष्पक्ष र उच्चस्तरीय छानबिनबाट स्पष्ट हुनुपर्ने वक्तव्यमा उल्लेख छ । कानुन, मानवअधिकार र स्थापित कार्यविधिविपरीत कार्य भएको पुष्टि भए जिम्मेवारमाथि कानुनबमोजिम कारबाही गर्नुपर्ने माग पनि गरिएको छ ।
राज्यको गुप्त सूचना प्रणाली, शान्ति–सुरक्षा व्यवस्थापन, प्रशासनिक समन्वय तथा संवेदनशील अवस्थाको पूर्वतयारीमा कमजोरी रहेको घटनाले उजागर गरेको दाबी गर्दै संघले यस्तो अवस्था सिर्जना हुनुमा सरकारको राजनीतिक उत्तरदायित्व रहेको जनाएको छ ।
वक्तव्यमा लोकतान्त्रिक शासन व्यवस्थामा नागरिकको जीवन, सुरक्षा र कानुनी शासनको अन्तिम जिम्मेवारी सरकारकै हुने उल्लेख गर्दै राज्यको कमजोरीका कारण नागरिकले ज्यान गुमाउनुपरे त्यसको नैतिक र राजनीतिक जिम्मेवारी सरकारले लिनुपर्ने धारणा व्यक्त गरिएको छ। विगतका यस्ता घटनामा स्थापित राजनीतिक नैतिकताको मापदण्ड सुनसरी घटनामा पनि समान रूपमा लागू हुनुपर्ने संघको भनाइ छ ।
संघले घटनाको स्वतन्त्र र उच्चस्तरीय छानबिन, सत्यतथ्य सार्वजनिक गर्न, दोषीमाथि कानुनबमोजिम कारबाही गर्न, मृतकका परिवारलाई उचित क्षतिपूर्ति उपलब्ध गराउन, घाइतेहरूको निःशुल्क उपचार सुनिश्चित गर्न तथा भविष्यमा यस्ता घटना दोहोरिन नदिन सुरक्षा र प्रशासनिक सुधारका प्रभावकारी उपाय तत्काल कार्यान्वयन गर्न सरकारसँग माग गरेको छ ।
साथै, अखिल नेपाल युवक संघले सम्पूर्ण नेपाली नागरिकलाई साम्प्रदायिक विद्वेष, धार्मिक अतिवाद, विदेशी हस्तक्षेप, जातीय विभाजन र हिंसात्मक उक्साहटबाट सचेत रहँदै राष्ट्रिय एकता, सामाजिक सद्भाव, राष्ट्रिय स्वाधीनता, लोकतान्त्रिक अधिकार र कानुनी शासनको पक्षमा दृढतापूर्वक उभिन आह्वान गरेको छ ।
