काठमाडौँ । सुनसरी घटनाको सन्दर्भमा नेकपा (मसाल) ले प्रश्न गरेको छ– ‘यस घटनामा गृहमन्त्रीले राजीनामा दिनुपर्दैन ?’
गत साल भदौ २३ गतेको गोलीकाण्डमा तत्कालीन प्रधानमन्त्री केपी शर्मा ओली र गृहमन्त्री रमेश लेखकलाई जिम्मेवार ठहर्याइएजस्तै यस सन्दर्भलाई जोड्दै मसालले सो प्रश्न उठाएको हो ।
महामन्त्री मोहनविक्रम सिंहको हस्ताक्षरमा २०८३ साउन १३ गते बुधबार प्रेसवक्तव्य जारी गर्दै मसालले तत्कालीन प्रधानमन्त्री ओली र गृहमन्त्री लेखकले राजीनामा दिएको घटना सरकारलाई स्मरण गराएको छ ।
मसालले सुनसरी घटनाको सन्दर्भमा त्यस क्षेत्रमा इसाई, हिन्दु र मुस्लिमका धार्मिक गतिविधि बढ्दै गएको निष्कर्ष निकालेको छ । त्यसले साम्प्रदायिक घटना निम्त्याउन सक्नेतर्फ मसालले सचेत गराएको छ ।
त्यस्तै सुनसरी घटनामा प्रहरीले अनावश्यक बलप्रयोग गरेको पनि मसालको अर्को निष्कर्ष छ । प्रचलित कानुनबमोजिम घुँडामुनि गोली हान्नुपर्नेमा कम्मरमुनि गोली लागेकोमा त्यसका लागि गृहमन्त्री गुरुङ जिम्मेवार रहेको मसालको भनाइ छ ।
यस्तो छ, प्रेसवक्तव्यको पूर्ण पाठ :
“सुनसरीको घटनाप्रति नेपाल कम्युनिस्ट पार्टी (मसाल) को गम्भीर ध्यान आकर्षित भएको छ । हामीले त्यहाँको घटनापछिको कारणबारे वस्तुगत तरिकाले अध्ययन गर्ने प्रयत्न गरेका थियौँ । त्यसपछि हामी दुईओटा निष्कर्षमा पुगेका छौँ : प्रथम– त्यो क्षेत्रमा विभिन्न विदेशी धार्मिक सम्प्रदायको गतिविधि निकै नै बढेर गएको छ । त्यहाँ सर्वप्रथम उच्च पहाडी क्षेत्रमा इसाई धर्मावलम्बीको गतिविधि धेरै नै बढेर गएको छ र उनीहरूको बढी झुकाव जातिवादतिर नै छ । त्यसका साथै त्यो क्षेत्रमा भारतका कट्टर हिन्दुवादी वा उनीहरूको संस्था राष्ट्रिय स्वयम्सेवक सङ्घको क्रियाकलाप पनि बढेर गएको छ । उनीहरूले सधैँ खास गरेर नेपालको तराईमा मुस्लिमका विरुद्ध साम्प्रदायिक गतिविधि बढाउने प्रयत्न गरिरहन्छन् । त्यसले गर्दा नेपालमा प्रायश: साम्प्रदायिक दङ्गा हुने वा अशान्तिको वातावरण पैदा हुने गर्दछ । त्यही प्रकारले त्यहाँ मदरसाको क्रियाकलाप पनि बढेर गएको छ । तराईमा रोहिङ्ग्या मुस्लिमको घुसपैठ बढेको बारेमा कैयौँ सञ्चारमाध्यमले आशङ्का व्यक्त गरिरहेका छन् । उक्त कारणले गर्दा सुनसरीमा प्राय: साम्प्रदायिक घटना घटिरहन्छन् र अहिलेको घटनाका पछाडि पनि मुख्य रूपले हिन्दु र मुसलमानका बिचको तनाव नै जिम्मेवार छ ।
द्वितीय– अहिले सुनसरीको घटनालाई पुलिस प्रशासनको अवाञ्चित प्रकारको कारबाहीले पनि बढी उत्तेजित बनाउने काम गर्यो । त्यहाँ हिन्दु र मुस्लिमको सामान्य प्रकारको तनावको अवस्थामा प्रहरीले अनावश्यक रूपले बलप्रयोग गरेको कारणले पनि त्यहाँको अवस्था बढी गम्भीर हुन पुग्यो । त्यहाँ प्रहरीले पूर्व सूचना नदिईकन अन्धाधुन्ध प्रकारले गोली चलाएको, त्यसका साथै प्रचलित नियमका विरुद्ध कैयौँ जनालाई घुडामाथि पनि गोली हानेका तथ्य बाहिर आएका छन् । बताइरहनुपर्ने आवश्यकता छैन कि त्यसका लागि नैतिक रूपले गृहमन्त्री नै जिम्मेवार छन् र हुन्छन् पनि ।
भदौँ २३ को गोलीकाण्डमा प्रधानमन्त्री त्यहाँ उपस्थित नभए पनि नैतिक रूपले उनी नै जिम्मेवार हुनुपर्दथ्यो र त्यही कारणले उनले र गृहमन्त्रीले पनि राजीनामा दिएका थिए । सुनसरीको घटनाको लागि गृहमन्त्री नै जिम्मेवार भएको हुनाले के उनले पनि राजीनामा दिनुपर्ने आवश्यकता छैन ? यो गम्भीर रूपले विचारणीय प्रश्न हो ।”
