काठमाडौँ । अर्थमन्त्री डा. स्वर्णिम वाग्लेले प्रधानमन्त्रीदेखि सबै मन्त्रीहरू नेपाली जनता, राजनीतिक दल तथा सम्बन्धित पार्टी नेतृत्वप्रति उत्तरदायी हुनुपर्ने बताएका छन्। उनको यो अभिव्यक्तिले सरकार सञ्चालन र राष्ट्रिय स्वतन्त्र पार्टी (रास्वपा) भित्रको आन्तरिक समन्वयबारे विभिन्न राजनीतिक वृत्तमा चर्चा सुरु भएको छ।
आर्थिक वर्ष २०८३/८४ को बजेट कार्यान्वयन योजनाबारे मंगलबार सबै मन्त्रालयका सचिवहरूसँग भएको छलफलमा मन्त्री वाग्लेले सुशासन, जवाफदेहिता र भ्रष्टाचार नियन्त्रणमा सरकार दृढ रहेको बताए।
उनले भने, “प्रधानमन्त्रीदेखि विभागीय मन्त्रीहरू सबै नेपाली जनता, राजनीतिक दल र सम्बन्धित नेतृत्वप्रति उत्तरदायी हुनुपर्छ।”
भ्रष्टाचार नियन्त्रणमा सरकारको नीति स्पष्ट रहेको उल्लेख गर्दै उनले “इमानदारी र भ्रष्टाचारप्रति शून्य सहनशीलता” को सिद्धान्तमा सरकार अडिग रहेको बताए। पुराना विकृति र विसंगतिलाई क्रमशः अन्त्य गर्दै कर्मचारीतन्त्रलाई प्रोत्साहन गर्ने नीति पनि सरकारले लिएको उनको भनाइ थियो।
तर, मन्त्री वाग्लेले सार्वजनिक कार्यक्रममा पटक–पटक “हामी नेपाली जनता, हाम्रो पार्टी र सम्बन्धित नेतृत्वप्रति जवाफदेही छौँ” भन्ने अभिव्यक्तिलाई जोड दिएपछि त्यसको राजनीतिक अर्थबारे विभिन्न कोणबाट विश्लेषण हुन थालेको छ।
विशेषगरी प्रधानमन्त्री र मन्त्रीहरू पार्टी नेतृत्वप्रति पनि उत्तरदायी हुनुपर्ने उनको भनाइलाई लिएर सरकारभित्र निर्णय प्रक्रिया, राजनीतिक समन्वय तथा रास्वपाको आन्तरिक नेतृत्व संरचनाबारे नयाँ प्रश्न उठ्न थालेका छन् । पछिल्ला दिनमा सरकार सञ्चालन, नीति कार्यान्वयन र दलभित्रको निर्णय प्रक्रियालाई लिएर भइरहेका बहसका सन्दर्भमा मन्त्री वाग्लेको अभिव्यक्तिलाई कतिपयले विशेष अर्थका साथ हेरेका छन्।
यद्यपि, मन्त्री वाग्लेले आफ्नो भनाइमा सरकार वा रास्वपा भित्र कुनै विवाद वा मतभेद रहेको प्रत्यक्ष रूपमा उल्लेख गरेका छैनन्। त्यसैले उनको अभिव्यक्तिलाई सरकार वा पार्टीभित्र संकटको संकेतका रूपमा निष्कर्ष निकाल्ने पर्याप्त आधार भने सार्वजनिक रूपमा देखिएको छैन। तर, पार्टी नेतृत्वप्रति जवाफदेहितालाई विशेष रूपमा जोड दिएको अभिव्यक्तिले राजनीतिक वृत्तमा विभिन्न अड्कलबाजी र विश्लेषणलाई भने थप बल दिएको छ।
