काठमाडौं, साउन ३ । नेकपाका वरिष्ठ नेता तथा पूर्वप्रधानमन्त्री झलनाथ खनालले प्रदेश सरकार गठनका क्रममा दक्षिणपन्थी शक्तिसँगको सहकार्यबाट टाढा रही वामपन्थी शक्तिहरूबीच एकता र सहकार्य गर्न पार्टी नेतृत्वलाई आग्रह गरेका छन्।
आइतबार जारी विज्ञप्तिमा उनले वर्तमान सरकारले जनअपेक्षाअनुसार काम गर्न नसकेको आरोप लगाउँदै राष्ट्रियता, जनजीविका, जनअधिकार, छिमेकी सम्बन्ध तथा राज्यका निकायबीचको समन्वय कमजोर बन्दै गएको बताएका छन्। देश जटिल राजनीतिक अवस्थामा रहेकाले लोकतान्त्रिक, वामपन्थी, समाजवादी र प्रगतिशील शक्तिहरू साझा उद्देश्यका साथ एकताबद्ध हुनुपर्ने उनको भनाइ छ।
प्रदेश सरकार गठनका लागि कुनै नयाँ राजनीतिक समीकरण बनाउनुअघि पार्टीको केन्द्रीय संयोजन समितिको बैठक बोलाई विस्तृत छलफल गर्न उनले नेतृत्वसँग माग गरेका छन्। वर्गीय दृष्टिकोण र क्रान्तिकारी उद्देश्यलाई केन्द्रमा राखेर मात्र नीति–निर्णय गर्नुपर्ने उनको जोड छ।
खनालले पदलोलुपता, व्यक्तिगत स्वार्थ र सम्झौतावादी प्रवृत्तिले पार्टीको विश्वसनीयतामा थप क्षति पुग्ने चेतावनी दिँदै वामपन्थी शक्तिहरूले आग्रह, पूर्वाग्रह, दम्भ र घमण्ड त्यागेर एकताको पहल गर्नुपर्ने बताएका छन्।
