कोलम्बो । नेपाली कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले बदलिँदो विश्व राजनीतिक परिवेशमा असंलग्नताको नीति र समाजवादी निर्माणलाई उत्पीडित राष्ट्रहरूको साझा ऐतिहासिक आवश्यकता भएको बताएका छन्।
श्रीलंकाको राजधानी कोलम्बोमा इन्टरनेशनल पिपुल्स एसेम्बलीद्वारा आयोजित ‘हेण्ड्स अफ एशिया’ अन्तर्राष्ट्रिय सम्मेलनलाई सम्बोधन गर्दै उनले समाजवाद निर्माणको राजनीतिक रूपरेखा प्रस्तुत गरेका हुन्।
सम्मेलनको उद्घाटन सत्रमा प्रमुख वक्ताका रूपमा बोल्दै प्रचण्डले एसियाली कम्युनिस्ट आन्दोलनका ऐतिहासिक उपलब्धि, त्यसले भोगेका चुनौती र भविष्यका सम्भावनाबारे आफ्नो धारणा राखे। उनले विश्व शक्ति सन्तुलनमा आएको परिवर्तन र महाशक्तिहरूबीच बढ्दो प्रतिस्पर्धाको सन्दर्भमा असंलग्न विदेश नीति र समाजवादी विकासको नयाँ बहस आवश्यक रहेको उल्लेख गरे।
सम्मेलनमा श्रीलंकाका वातावरणमन्त्री डा. दम्मिका पाताबेन्दीले अन्तर्राष्ट्रिय मुद्रा कोष (आईएमएफ) को ऋण कार्यक्रमका कडा सर्तबीच जनमुखी विकासको वैकल्पिक मोडेलबारे धारणा राखे। यस्तै, मार्क्सवादी लेखक तथा इतिहासकार विजय प्रसादले विश्वव्यापी सैन्यीकरण, सार्वभौम ऋण संकट र उग्र दक्षिणपन्थको उदयलाई साम्राज्यवादी संरचनासँग जोडेर विश्लेषण प्रस्तुत गरे।
तीन दिनसम्म सञ्चालन हुने सम्मेलनमा एसिया, ल्याटिन अमेरिका तथा अन्य क्षेत्रका वामपन्थी दल र प्रगतिशील आन्दोलनका प्रतिनिधिहरू सहभागी छन्। सम्मेलनका क्रममा प्रचण्डले विभिन्न कम्युनिस्ट तथा वामपन्थी दलका नेतासँग द्विपक्षीय र बहुपक्षीय भेटवार्ता गर्ने कार्यक्रम रहेको छ। उनले क्युबा, भेनेजुएला र ब्राजिलका वामपन्थी नेतासँग पनि भेटवार्ता गरिसकेका छन्।
यसैबीच, सम्मेलनको दोस्रो सत्रमा नेपाली कम्युनिस्ट पार्टीका नेता बलराम बास्कोटाले ‘वामपन्थी शक्तिहरूबीचको विभाजनमा साम्राज्यवादको भूमिका’ विषयमा वैचारिक कार्यपत्र प्रस्तुत गरेको आयोजकले जनाएको छ।
