काठमाडौं, असार ३१ । राष्ट्रिय स्वतन्त्र पार्टी (रास्वपा)का केन्द्रीय सदस्य मनीष झाले सञ्चारगृहलगायत विभिन्न स्थानमा सवारीसाधन तेर्स्याएर आवागमन अवरुद्ध गरिएको घटनाप्रति आपत्ति जनाएका छन्। उनले यस्ता गतिविधिमा संलग्न व्यक्तिमाथि निष्पक्ष अनुसन्धान गरी कानुनी कारबाही गर्न माग गरेका छन्।
सामाजिक सञ्जाल फेसबुकमार्फत आफ्नो धारणा सार्वजनिक गर्दै झाले सञ्चारगृहलगायतका स्थानमा गाडी तेर्स्याएर अवरोध सिर्जना गर्नु गलत कार्य भएको बताएका छन्। उनले लेखेका छन्, “यसमा जो संलग्न छन्, उनीहरूमाथि अनुसन्धान र कारबाही हुनुपर्छ। राज्यले नागरिकको चिन्ता सम्बोधन गर्ने हो, राज्य आफैँ नागरिकलाई थप आतङ्कित बनाउने होइन।”
सरकारको कार्यशैलीप्रति प्रश्न उठाउँदै उनले लेखेका छन्, “यस्तो बचपनाले राजकाज चल्छ र? के यस्तै स्तरहीन र गलत प्रयोग गर्न जेनजीले सहादत दिएको हो?”
झाले यस्ता अराजक गतिविधिप्रति आफ्नो घोर असहमति र आपत्ति रहेको स्पष्ट गर्दै कानुनको शासन, नागरिकको सुरक्षा तथा लोकतान्त्रिक मूल्य–मान्यताको सम्मान गर्न सरकारलाई आग्रह गरेका छन्।
