काठमाडौं, ३० असार । प्रतिनिधिसभाको बैठकमा सरकारमाथि उठेका विभिन्न विषयलाई लिएर प्रतिपक्ष र सत्तापक्षबीच चर्को बहस भएको छ। बहसका क्रममा राष्ट्रिय स्वतन्त्र पार्टी (रास्वपा)का सांसदहरूले पटक–पटक नियमापत्ति जनाएका छन्।
प्रतिपक्षी सांसदहरूले सुकुमवासी होल्डिङ सेन्टर डुबान, गणेश नेपालीको आत्मदाह, सञ्चारगृह तथा नेपाली कांग्रेसका सभापति गगन थापाको निवासअगाडि शंकास्पद गाडी पार्किङलगायतका विषयमा सरकारसँग जवाफ मागेका थिए।
नेकपा सांसद रमेश कुमार मल्लले ती घटनामा राज्य संरक्षित व्यक्तिहरूको संलग्नता रहेको आशंका व्यक्त गरेपछि रास्वपाकी सांसद टीका संग्रौलाले नियमापत्ति गर्दै प्रमाणबिनै सिंगो राज्यलाई जोडेर अभिव्यक्ति दिन नमिल्ने बताइन्। उनले सरकारले घटनाको छानबिन र कारबाही गर्ने प्रतिबद्धता जनाइसकेको उल्लेख गर्दै तथ्यका आधारमा मात्र आरोप लगाउन आग्रह गरिन्।
यस्तै, कांग्रेसका सचेतक निश्कल राईले प्रधानमन्त्री बालेन्द्र शाहलाई व्यंग्यात्मक रूपमा सम्बोधन गर्दै सरकार आलोचना र प्रश्नप्रति असहिष्णु बनेको आरोप लगाए। त्यसलगत्तै रास्वपाका सांसद शिवशंकर यादवले नियमापत्ति गर्दै प्रधानमन्त्रीलाई गरिएको उक्त सम्बोधन संविधानसम्मत नभएको भन्दै संसद्को अभिलेखबाट हटाउन माग गरेका छन्।
