काठमाडौं, असार ३० । नेपाली कांग्रेस संसदीय दलका सचेतक निश्कल राईले प्रधानमन्त्री बालेन्द्र शाहको कार्यशैलीप्रति संसद्मा कडा टिप्पणी गरेका छन्। उनले वर्तमान सरकार आलोचना र प्रश्नप्रति असहिष्णु बन्दै गएको आरोप लगाएका छन्।
प्रतिनिधिसभाको सोमबार बसेको बैठकमा बोल्दै राईले प्रधानमन्त्रीलाई कसैले प्रश्न गर्न नसक्ने वातावरण सिर्जना भएको दाबी गरे। उनले व्यंग्य गर्दै भने, “प्रधानमन्त्री बालेन्द्र शाहलाई प्रश्न गर्न पाइँदैन ?”
राईले विगतमा अभिव्यक्ति स्वतन्त्रता र जनताको पक्षमा बोल्ने बालेन्द्र शाह र अहिले प्रधानमन्त्रीको भूमिकामा रहेका बालेन्द्र शाहबीच ठूलो अन्तर देखिएको टिप्पणी गरे। उनले सरकार लोकतान्त्रिक मूल्य–मान्यताभन्दा बाहिर गएर अघि बढ्न खोजेको आरोपसमेत लगाए।
उनले राज्यका सुरक्षा संयन्त्रभित्र अनधिकृत नेटवर्कको प्रभाव बढ्दै गएको दाबी गर्दै सुरक्षा घेराभित्र अनधिकृत व्यक्तिहरू सक्रिय रहँदा पनि सत्ता पक्षका सांसदहरू मौन बसेको आरोप लगाए।
साथै, सोमबार भएका केही घटनाप्रति संकेत गर्दै राईले नेपाली कांग्रेसका सभापति गगन थापाको निवास तथा एक सञ्चारगृहअगाडि सवारीसाधन तेर्स्याइएको घटनालाई अलोकतान्त्रिक गतिविधिको उदाहरण भएको बताए। यस्ता गतिविधिले लोकतान्त्रिक अभ्यास कमजोर बनाउने र राज्य आतंकको अवस्था सिर्जना गर्ने उनको भनाइ थियो।
राईले सरकारलाई लोकतान्त्रिक मूल्य, विधिको शासन र अभिव्यक्ति स्वतन्त्रताको सम्मान गर्दै संसद् र जनताप्रति उत्तरदायी ढंगले अघि बढ्न आग्रह गरे।
