काठमाडौं, असार ३० — सर्लाहीको गोडैता नगरपालिकाका २५ वर्षीय विवेक मण्डलको आत्मदाह प्रयासपछि उपचारका क्रममा निधन भएको छ।
गत शुक्रबार आफ्नै शरीरमा पेट्रोल खन्याएर आगो लगाएका मण्डललाई हेलिकप्टरमार्फत काठमाडौं ल्याई कीर्तिपुरस्थित बर्न अस्पतालमा उपचारका लागि भर्ना गरिएको थियो। शुक्रबार साँझ करिब ७:३० बजे अस्पताल पुर्याइएका उनलाई आईसीयूमा राखेर उपचार भइरहेको थियो।
अस्पतालका मेडिकल डाइरेक्टर डा. किरण नकर्मीका अनुसार मण्डलको सोमबार बिहान २:०५ बजे उपचारकै क्रममा निधन भएको हो। उनका अनुसार मण्डलको शरीरको करिब ८५ प्रतिशत भाग जलेको थियो, जसका कारण उनको अवस्था अत्यन्त गम्भीर बनेको थियो।
प्राप्त जानकारीअनुसार मण्डलले घरबाट करिब २०० मिटर टाढा पुगेर आफ्नै शरीरमा पेट्रोल खन्याई आगो लगाएका थिए। घटनापछि स्थानीयको सहयोगमा उद्धार गरी प्रारम्भिक उपचारपछि थप उपचारका लागि काठमाडौं ल्याइएको थियो।
यसैबीच, पछिल्ला केही दिनयता आत्मदाहका घटनाहरू बढ्दै गएका छन्। बिहीबार काठमाडौंको त्रिपुरेश्वरमा मुगुका गणेश नेपालीले आत्मदाह प्रयास गरेका थिए। उनको पनि उपचारका क्रममा वीर अस्पतालमा निधन भएको थियो। त्यसको भोलिपल्ट शनिबार काठमाडौंको बुद्धनगर क्षेत्रमा पनि एक जनाले आत्मदाह गरेको घटना सार्वजनिक भएको थियो।
लगातार यस्ता घटनाहरू सार्वजनिक हुन थालेपछि मानसिक स्वास्थ्य, सामाजिक सुरक्षा तथा संकटमा परेका व्यक्तिहरूका लागि प्रभावकारी सहयोग प्रणालीको आवश्यकताबारे पुनः बहस सुरु भएको छ।
