काठमाडौँ, असार २८ । राष्ट्रिय जनमोर्चाले वर्तमान सरकारका नीति तथा गतिविधिले नेपाललाई चीनविरुद्ध पश्चिमी शक्तिहरूको मोर्चातर्फ धकेल्ने प्रयास भइरहेको भन्दै त्यसप्रति गम्भीर चिन्ता व्यक्त गरेको छ ।
कार्यवाहक अध्यक्ष रश्मीराज नेपालीद्वारा असार २८ गते आइतबार जारी प्रेस वक्तव्यमा असार २२ गते दलाई लामाको जन्मदिन मनाउन अनुमति दिएको विषयलाई पनि जनमोर्चाले नेपालको एक–चीन नीतिविपरीत भएको दाबी गरेको छ । वक्तव्यमा सरकारको उक्त निर्णयले नेपाललाई अनावश्यक अन्तर्राष्ट्रिय विवादमा तानेको आरोप लगाइएको छ ।
गणेश नेपालीको आत्मदाहको घटनालाई सरकारको अधिनायकवादी प्रवृत्ति, बढ्दो महँगी, बेरोजगारी, भ्रष्टाचार र विभेदपूर्ण नीतिविरुद्ध जनअसन्तोषको विस्फोटक अभिव्यक्ति भएको राष्ट्रिय जनमोर्चाले टिप्पणी गरेको छ ।
त्यस्तै गणेश नेपालीको आत्मदाहलाई अत्यन्त दुःखद घटना भन्दै त्यसको नैतिक जिम्मेवारी सरकारले लिनुपर्ने जनमोर्चाको जोड दिएको छ । वक्तव्यमा सरकारले अवलम्बन गरेका नीतिका कारण जनतामा असन्तोष बढ्दै गएको दाबी गरिएको छ ।
त्यस्तै भदौ २४ गते भएका आगजनी, तोडफोड, हत्या तथा ध्वंसात्मक गतिविधिसँग सम्बन्धित मुद्दाहरू स्थगित वा फिर्ता लिन सरकारबाट अदालतलाई निर्देशन दिइएको भन्ने विषयप्रति पनि राष्ट्रिय जनमोर्चाले गम्भीर आपत्ति जनाएको छ ।
वक्तव्यमा लेखिएको छ :
प्रेस वक्तव्य
“१. गणेश नेपाली आत्मदाहको घटनाप्रति हाम्रो गम्भीर ध्यानाकर्षण भएको छ । गणेश नेपाली आत्मदाह निक्कै दुःखदायी घटना हो । यो घटना सरकारले लिँदै गएको अधिनायकवादी स्वरुप, समाजवमा ब्याप्त बढ्दो महङ्गी, बेरोजगारी, भ्रष्टाचार राज्यको भेदभावपूर्ण नीतिका विरुद्ध देखापरेको असन्तोषको विष्फोटक रूप हो । गणेश नेपाली आत्मदाह घटना निम्त्याउने सरकारको जति विरोध गरे पनि कम हुन्छ ।
२. भाद्र २४ गतेका अपराधजन्य कारबाहीका विरुद्ध सरकार पक्ष भएर विभिन्न अदालतमा चलिरहेका मुद्दाहरूलाई स्थगित गर्नका लागि सरकारबाट दिइएको निर्देशनप्रति पनि हाम्रो पार्टी राष्ट्रिय जनमोर्चाको गम्भीर ध्यानाकर्षण भएको छ । भाद्र २४ गते सिंहदरबार र सर्वोच्च अदालत सहित देशव्यापी रूपमा भएका आगलागी, तोडफोड, हत्या र ध्वंसात्मक कार्यहरूका लागि कथित रास्वपा वा वर्तमान सरकारसित सम्बन्धित तत्वहरू पनि जिम्मेवार भएको तथ्य छर्लङ्ग छ । त्यसैले सरकारले ती मुद्दाहरू फिर्ता लिनको लागि नाङ्गो प्रकारले निर्देशन दिएको कुरामा कुनै शङ्का रहन्न ।
३. यही असार २२ गते दलाई लामाको जन्म दिन मनाउन कथित आयोजकहरूलाई सरकारले दिएको छुटप्रति पनि हाम्रो पार्टीले गम्भीर आपत्ति प्रकट गर्दछ । सरकारद्वारा नेपालको राजनीतिक इतिहासमा नै प्रथमपल्ट त्यस प्रकारको छुट दिएको हो । नेपालले एक चीन नीतिलाई समर्थन गर्दछ । दलाई लामालाई प्रयोग गरेर पश्चिमा शक्तिहरूले तिब्बतलाई टुक्राउन कैयौँ षड्यन्त्र र ठुलो पैमानामा आर्थिक लगानी गर्दै आएका छन् । यस्तो स्थितिमा सरकारले नै वैधानिक रूपमा दलाई लामाको जन्मदिन मनाउन छुट दिने कुरा सही हुन सक्दैन । सरकारको त्यो कार्यले नेपाललाई अनावश्यक विवादमा तानेको छ । सरकारको कार्य कुनै अज्ञाता वा भूलबस भएको आकस्मिक घटना होइन । जेनजी आन्दोलनपछि गठन भएको सुशीला कार्की र वर्तमान सरकारका नीति र कार्यले चीनका विरुद्ध पश्चिमाहरूको मोर्चामा नेपाललाई सामेल गर्दै लैजानु गम्भीर चिन्ताको विषय हो ।”
धन्यवाद !
२०८३ असार २८ गते
