काठमाडौं, असार २७ । नेपाल दलित मोर्चा, केन्द्रीय समितिले मुगुको सोरु गाउँपालिकाका २५ वर्षीय गणेश नेपालीको आत्मदाह प्रयासपछि भएको मृत्युप्रति गहिरो दुःख व्यक्त गर्दै घटनाको निष्पक्ष छानबिन र दोषीमाथि कडा कानुनी कारबाही गर्न सरकारसँग माग गरेको छ।
मोर्चाले जारी गरेको प्रेस वक्तव्यमा गणेश नेपाली रोजगारीको खोजीमा काठमाडौं आएका बेला त्रिपुरेश्वरस्थित राहदानी विभाग अगाडि आत्मदाह प्रयास गरेको र त्यसपछि उनको मृत्यु भएको उल्लेख गरिएको छ। संगठनले शोकसन्तप्त परिवारप्रति समवेदना व्यक्त गर्दै पीडित परिवारलाई उचित क्षतिपूर्ति उपलब्ध गराउन पनि सरकारसँग आग्रह गरेको छ।
वक्तव्यमा वर्तमान सरकारको गैरजिम्मेवार रवैया, बेरोजगारी र सुशासनको अभावका कारण नागरिक निराश बन्दै गएको दाबी गर्दै यस्ता घटनाले राज्य गम्भीर बन्नुपर्ने आवश्यकता औँल्याइएको छ। साथै, घटनाको सत्यतथ्य छानबिन नभए गणेश नेपालीलाई न्याय दिलाउन देशव्यापी आन्दोलनमा उत्रिने चेतावनी पनि नेपाल दलित मोर्चाले दिएको छ।
