काठमाडौं, असार २६ । अखिल नेपाल युवक संघले युवा गणेश नेपालीको निधनप्रति गहिरो दुःख व्यक्त गर्दै घटनाको निष्पक्ष तथा उच्चस्तरीय छानबिन गरी दोषी देखिने व्यक्ति वा निकायलाई कानुनबमोजिम कारबाही गर्न सरकारसँग माग गरेको छ।
संघका अध्यक्ष गणेश अधिकारीद्वारा असार २६ गते शुक्रबार जारी प्रेस विज्ञप्तिमा मृतकप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरिएको छ । विज्ञप्तिमा उक्त घटनाले ट्राफिक कारबाही, चर्को जरिवाना, सम्बन्धित निकायहरूको व्यवहार, उपचारमा भएको भनिएको ढिलासुस्ती तथा समग्र राज्य संयन्त्रको नागरिकप्रतिको उत्तरदायित्वबारे गम्भीर प्रश्न उठाएको उल्लेख गरिएको छ।
संघले कानुन कार्यान्वयनका नाममा गरिब तथा श्रमजीवी नागरिकमाथि हुने असंवेदनशील व्यवहार लोकतान्त्रिक राज्यका लागि स्वीकार्य हुन नसक्ने जनाएको छ। साथै, कानुन कार्यान्वयनसँगै मानवता, संवेदनशीलता र नागरिकको सम्मानलाई उच्च प्राथमिकतामा राख्न राज्यका सबै निकायलाई आग्रह गरेको छ।
प्रेस विज्ञप्तिमार्फत संघले मृतकका परिवारलाई उचित क्षतिपूर्ति तथा राहत उपलब्ध गराउन, उपचारमा लापरबाही भएको पुष्टि भए सम्बन्धित जिम्मेवारमाथि कानुनी कारबाही गर्न तथा भविष्यमा यस्ता घटना दोहोरिन नदिने गरी ट्राफिक, नगर प्रहरीलगायत सरकारी निकायहरूको कार्यशैली नागरिकमैत्री बनाउन नेपाल सरकारसँग माग गरेको छ।
संघले राज्यको पहिलो दायित्व नागरिकको जीवन, सम्मान र अधिकारको रक्षा गर्नु भएकाले पीडित परिवारले न्याय पाउने र यस्ता दुःखद घटना पुनः नदोहोरिने वातावरण निर्माण गर्न सम्बन्धित सबै पक्ष गम्भीर बन्नुपर्नेमा जोड दिएको छ।
