काठमाडौँ, असार २६ । राष्ट्रिय सभाका सदस्य राजशे विश्वकर्मा (तुलप्रसाद)ले पठाओ चालक गणेश नेपालीको मृत्यु घटनालाई दुःखद र निन्दनीय भन्दै सरकारको कडा आलोचना गरेका छन् । राष्ट्रिय सभाको २१औँ अधिवेशनअन्तर्गत शुक्रबार (२०८३ असार २६) बसेको बैठकको आकस्मिक समयमा बोल्दै सांसद विश्वकर्माले नयाँ सरकार गठनपछि विभिन्न दुःखद र विवादास्पद घटनाहरू भइरहेको दाबी गरे।
उनले हिरासतभित्र मृत्यु हुने घटना, सुकुम्बासी बस्तीमा डोजर चलाइने कार्य तथा गरिब तथा विपन्न समुदायमाथि दमन भइरहेको आरोप लगाए । सरकारलाई सचेत गराउँदै ‘अति गरे खति हुन्छ’ विश्वकर्माले भने ।
उनले मुगुको सोरु गाउँपालिकाका २५ वर्षीय गणेश नेपाली कृषि विषयमा अध्ययन गरेका शिक्षित युवा भए पनि रोजगारीको अभावका कारण पठाओ सेवा सञ्चालन गरेर परिवारको जीविकोपार्जन गर्दै आएको बताए ।
सांसद विश्वकर्माका अनुसार गत बिहीबार त्रिपुरेश्वरस्थित काठमाडौं महानगरपालिका कार्यालय परिसरमा मोटरसाइकल पार्क गरेपछि नगर प्रहरीले उनको मोटरसाइकलमा ह्विल लक लगाएको थियो । त्यसक्रममा भएको विवादपछि उनलाई जरिवाना गरिएको र करिब १० हजार रुपैयाँ तिर्न भनिएको उनले बताए । आर्थिक अवस्था कमजोर भएकाले उनले दाजुसँग सहयोग मागे पनि रकम जुट्न नसकेको विश्वकर्माको भनाइ थियो ।
त्यसपछि निराश बनेका गणेश नेपालीले आफ्नै शरीरमा पेट्रोल छर्केर आगो लगाएको उल्लेख गर्दै सांसद विश्वकर्माले घटनास्थलमा रहेका सुरक्षाकर्मी र सम्बन्धित निकायले उनलाई बचाउन आवश्यक पहल नगरेको आरोप लगाए। उनले आगो लगाएपछि मात्रै उनलाई अस्पताल लगिएको र उपचारका क्रममा मृत्यु भएको बताए।
घटनाप्रति दुःख व्यक्त गर्दै सांसद विश्वकर्माले सरकारलाई जनतामाथि हुने दमन र उत्पीडन रोक्न आग्रह गरे। उनले “हाम्रा पुर्खाले भनेझैँ, अति गरे खति हुन्छ” भन्दै गरिब, सुकुम्बासी, दलित, अल्पसंख्यक तथा निमुखा नागरिकमाथिको दमनले सरकारलाई दीर्घकालीन रूपमा नकारात्मक असर पार्ने चेतावनी दिए ।
