जनकपुरधाम, २६ असार । मिटरब्याज पीडितहरूले ६ बुँदे मागसहित जनकपुरधामको ऐतिहासिक तिरहुतियागाछीबाट काठमाडौंतर्फ पदयात्रा सुरु गरेका छन्।
सरकारसँग विगतमा भएका सहमति कार्यान्वयन नभएको र पीडितहरूले अझै न्याय नपाएको भन्दै उनीहरू ‘मिटरब्याजविरुद्ध किसान मजदुर आन्दोलन नेपाल’को नेतृत्वमा काठमाडौं केन्द्रित आन्दोलनमा उत्रिएका हुन्।
पीडितहरूले मिटरब्याजसँग सम्बन्धित तमसुक, दृष्टिबन्धक, रजिस्ट्रेसन तथा चेकलगायत फर्जी कागजात मन्त्रिपरिषद्बाट अवैध घोषणा गरी खारेज गर्न, मिटरब्याज नियन्त्रणका लागि विशेष ऐन ल्याउन, विशेष न्यायाधिकरण गठन गर्न, फर्जी मुद्दाको पुनरावलोकन गर्न तथा दोषीको गैरकानुनी सम्पत्ति जफत गरी पीडितको सम्पत्ति फिर्ता गर्न माग गरेका छन्। साथै शोषित तथा साना व्यवसायीका लागि सहज ऋण र वित्तीय पहुँच सुनिश्चित गर्न पनि उनीहरूले सरकारसँग आग्रह गरेका छन्।
आन्दोलनका अध्यक्ष कुशवाहाका अनुसार विगतमा सरकारसँग पटक–पटक सम्झौता भए पनि कार्यान्वयन नभएकाले पुनः आन्दोलनको बाटो रोज्नुपरेको हो। पीडितका नेता मनोज पासवानले पदयात्राका क्रममा दैनिक २०–२५ किलोमिटर हिँडिने र बाटोमा अन्य जिल्लाका पीडितहरू पनि अभियानमा जोडिँदै जाने बताए।
