काठमाडौं, असार २४ । राष्ट्रिय जनमोर्चाले सरकारद्वारा गठित संविधान संशोधन बहसपत्र निर्माण कार्यदलले गणतन्त्र, धर्मनिरपेक्षता र समावेशिताजस्ता संविधानका आधारभूत उपलब्धिलाई समाप्त गरी देशलाई प्रतिगमनतर्फ धकेल्ने उद्देश्यसहित संविधान संशोधन बहसपत्रको आडमा षड्यन्त्र गरिरहेको आरोप लगाउँदै त्यसको विरोध तथा पार्टीको संविधान संशोधनसम्बन्धी अवधारणा सार्वजनिक गर्न पत्रकार सम्मेलन तथा अन्तर्क्रिया कार्यक्रम आयोजना गरेको छ।
उक्त कार्यक्रम आज २०८३ असार २४ गते दिउँसो १ बजे राष्ट्रिय प्रेस क्लब (युनियन हाउस), अनामनगर मा आयोजना हुने जनाइएको छ ।
कार्यक्रमको अध्यक्षता राष्ट्रिय जनमोर्चाकी नेतृ दुर्गा पौडेलले गर्नुहुनेछ भने कार्यवाहक अध्यक्ष रश्मिराज नेपाली प्रमुख अतिथिका रूपमा सहभागी हुनुहुनेछ । कार्यक्रमको सहजीकरण मनोज भट्टले गर्नुहुनेछ ।
राष्ट्रिय जनमोर्चाले पत्रकार सम्मेलनमार्फत संविधान संशोधनका नाममा लोकतान्त्रिक उपलब्धिमाथि हुन खोजिएको हस्तक्षेपबारे आफ्नो धारणा स्पष्ट पार्दै संविधानको मूल मर्म, गणतन्त्र, धर्मनिरपेक्षता र समावेशिताको रक्षा गर्नुपर्ने विषयमा पार्टीको आधिकारिक अवधारणा सार्वजनिक गर्ने जनाएको छ। साथै, कार्यक्रममा सञ्चारकर्मी तथा सरोकारवालाहरूको उपस्थितिका लागि अनुरोध गरिएको छ ।
