काठमाडौं। प्रतिनिधिसभाको बैठकमा नेपाली कांग्रेसका नेता भिष्मराज आङ्देम्बेले सरकारको सुशासन, संसदीय अभ्यास, भ्रष्टाचारका मुद्दा तथा प्रधानमन्त्रीको भूमिकाबारे कडा प्रश्न उठाएका छन्।
रोस्टमबाट सम्बोधन गर्दै आङ्देम्बेले विगतमा राष्ट्रवाद र सुशासनको पक्षमा चर्को आवाज उठाउनेहरू अहिले मौन बनेको टिप्पणी गरे। उनले सुशासनको नारा दिएर निर्वाचन जिते पनि भ्रष्टाचारसम्बन्धी मुद्दामा संसदको नियमावली संशोधन गरी निलम्बन नहुने व्यवस्था गरिएको आरोप लगाए।
उनले छानबिन आयोग गठनको प्रक्रियामाथि पनि प्रश्न उठाउँदै आयोगले निष्पक्ष छानबिन गर्न नसकेको दाबी गरे। विगतमा मन्त्रीहरूमाथि उठेका प्रश्नमा कडा प्रतिक्रिया जनाउनेहरू अहिले अर्थमन्त्रीमाथि उठेका प्रश्नमा मौन बसेको भन्दै उनले त्यसको कारणबारे सरकारसँग जवाफ मागे।
आङ्देम्बेले आफ्नो सम्बोधनका क्रममा बल्खुका इन्द्रबहादुर राईको प्रसंग पनि उठाए। उनले प्रधानमन्त्रीलाई सभामुखमार्फत प्रश्न गर्दै राईलाई चिन्नुहुन्छ वा हुन्न भन्ने जिज्ञासा राखे। बल्खुमा टहरा हटाउने क्रममा उत्पन्न परिस्थितिका कारण इन्द्रबहादुर राईले ज्यान गुमाउनुपरेको उल्लेख गर्दै उनले यस्ता घटनाप्रति सरकार संवेदनशील हुनुपर्ने धारणा व्यक्त गरे।
उनले संसदीय अभ्यासबारे बोल्दै विश्वका संसदीय व्यवस्थामा सरकारको नीति तथा कार्यक्रम मन्त्रिपरिषद्ले तयार गर्ने र राष्ट्राध्यक्षले संसदमा प्रस्तुत गर्ने परम्परा रहेको स्मरण गराए। तर आफ्नै सरकारले तयार गरेको नीति तथा कार्यक्रम प्रस्तुत भइरहेका बेला प्रधानमन्त्री बैठकबाट बाहिरिएको घटना संसदीय मर्यादा, राष्ट्रपतिको सम्मान तथा जनमतप्रतिको सम्मानको दृष्टिले उपयुक्त नभएको उनको भनाइ थियो।
आङ्देम्बेले संसदमा निर्वाचित सबै सांसद जनताको मतबाट आएको स्मरण गराउँदै सत्तापक्षका सांसदहरू स्वतन्त्र जनप्रतिनिधि भएको उल्लेख गरे। उनले सांसदहरूले दलगत सीमाभन्दा माथि उठेर जनताको हित र संसदीय मर्यादाको पक्षमा उभिनुपर्नेमा जोड दिए।
उनको सम्बोधनका क्रममा सत्ता र प्रतिपक्षबीच केहीबेर आरोप–प्रत्यारोपको अवस्था सिर्जना भएको थियो। आङ्देम्बेको अभिव्यक्तिप्रति सत्तापक्षका सांसदहरूले आपत्ति जनाएका थिए भने प्रतिपक्षले सरकारको जवाफदेहिता र संसदीय मर्यादाको विषयमा बहस आवश्यक रहेको धारणा राखेको थियो।
