काठमाडौं, असार २३ । काठमाडौं जिल्ला अदालतले बहुचर्चित नक्कली भुटानी शरणार्थी प्रकरणमा ३० जना प्रतिवादीमध्ये १८ जनालाई ठगी, सरकारी लिखत किर्ते, संगठित अपराध, राज्यविरुद्धको कसुर तथा एकीकृत कसुरमा दोषी ठहर गरेको छ भने १२ जनालाई सफाइ दिएको छ।
जिल्ला न्यायाधीश तेजबहादुर खड्काको इजलासले नेपाली नागरिकलाई नक्कली भुटानी शरणार्थी बनाई अमेरिका पठाइदिने भन्दै संगठित रूपमा ठगी गरिएको, सरकारी कागजात किर्ते गरिएको तथा त्यसका लागि विभिन्न सरकारी संयन्त्रको दुरुपयोग भएको ठहर गरेको हो।
अदालतले पूर्वगृहमन्त्री बालकृष्ण खाँडलाई ठगी तथा संगठित अपराधमा मतियारको रूपमा दोषी ठहर गरेको छ। यस्तै, केशवप्रसाद दुलाल, सानु भण्डारी, टेकनारायण पाण्डे, टोपबहादुर रायमाझी, सागर राई, सन्देश शर्मा, डा. इन्द्रजित राई, विक्रम भनिने गोविन्दकुमार चौधरी, आडटावा शेर्पालगायतलाई विभिन्न कसुरमा दोषी ठहर गरिएको छ।
अदालतले रामशरण केसी, टंककुमार गुरुङ, सन्दीप रायमाझी, प्रतीक थापा, लक्ष्मी महर्जन, केशव तुलाधर, आशीष बुढाथोकीलगायत १२ जनालाई भने आरोपबाट सफाइ दिएको छ।
दोषी ठहर भएका प्रतिवादीहरूको सजाय निर्धारणका लागि सरकारी वकिल कार्यालयलाई सजायसम्बन्धी प्रतिवेदन पेस गर्न आदेश दिइएको अदालतले जनाएको छ।
