बुटवल । तराई मधेस जनवादी मोर्चाका केन्द्रीय सदस्य इन्दल केवटको स्मृतिमा श्रद्धाञ्जली सभा सम्पन्न भएको छ ।
राष्ट्रिय जनमोर्चा रुपन्देहीको आयोजनामा २०८३ असार २० गते उहाँकै निवास रोहिणी–५ तरकुलामा सो कार्यक्रम सम्पन्न भएको हो ।
कार्यक्रममा मन्तव्य राख्दै राजमो अध्यक्ष चित्रबहादुर केसीले स्मृतिशेष केवटले निरङ्कुश पञ्चायती व्यवस्थाको विरोधमा आवाज उठाएर राजनीतिक यात्रा सुरु गरेको बताउनुभयो ।
स्थानीय जालीफटाहा तथा सामन्तको विरोधमा केवटले आवाज उठाएको स्मरण गर्दै केसीले भन्नुभयो– ‘२०४६ साल र २०६२–६३ सालको जनआन्दोलनमा सहभागितासँगै केवटले राष्ट्र र राष्ट्रियताको पक्षमा लगातार सङ्घर्ष गर्दै आउनुभएको थियो ।’
केवटको निधनले नेकपा (मसाल) र राष्ट्रिय जनमोर्चासँगै तराई मधेस जनवादी मोर्चाले होनहार कार्यकर्ता गुमाएको बताउँदै अध्यक्ष केसीले केवटले अपनाएको राजनीतिलाई अगाडि बढाउनु नै उहाँप्रति सच्चा श्रद्धाञ्जली हुने बताउनुभयो ।
राजमो रोहिणी गाउँ समितिका सदस्य जर्नेल केवटले स्मृतिशेष केवटले स्थानीय स्तरदेखि गर्दै आउनुभएको न्यायपूर्ण सङ्घर्षसहित उहाँको जीवन समेटिएको मन्तव्य राख्नुभएको थियो ।
कार्यक्रममा नेकपा (मसाल) रुपन्देहीका प्रवक्ता लालचन्द पन्थ र स्थानीय नेता किरण शाहनीले पनि शोकमन्तव्य राख्नुभएको थियो ।
तमजमोका अध्यक्ष बद्रे आलमको सञ्चालन तथा राजमो रुपन्देहीका कावा अध्यक्ष इन्दिरा ज्ञवालीको अध्यक्षतामा उक्त कार्यक्रम सम्पन्न भएको थियो ।
कार्यक्रममा मसालसम्बद्ध विभिन्न जनवर्गीय सङ्गठनका नेता, कार्यकर्ता तथा शुभचिन्तकको सहभागिता रहेको थियो ।
पेटको रोगबाट ग्रसित केवटको गत असार १३ गते ७२ वर्षको उमेरमा असामयिक निधन भएको थियो ।
