काठमाडौँ । राष्ट्रियसभाका सांसद तथा राष्ट्रिय जनमोर्चाका केन्द्रीय सल्लाहकार राजेश विश्वकर्मा (तुलप्रसाद) ले सरकारप्रति आरोप लगाउँदै भन्नुभएको छ–’जेनजीको भनिएको वर्तमान सरकारले युवा तथा खेलकुद मन्त्रालयको बजेट कटौती गरेको छ ।’

२०८३ असार १९ गते शुक्रबार राष्ट्रियसभाको एकाइसौँ अधिवेशनअन्तर्गत विनियोजन विधेयक–२०८३ माथिको छलफलमा भाग लिँदै उहाँले सो अभिव्यक्ति दिनुभएको हो ।

‘यो सरकारले आफूलाई जेनजी आन्दोलनबाट आएको बताउँछ’ उहाँले भन्नुभयो– ‘तर युवा तथा खेलकुद मन्त्रालयको बजेट घटाउँदै जान्छ ।’
उहाँले युवाका रोजगारी तथा खेलकुद क्षेत्रको विकासतर्फ अपेक्षित ध्यान दिन नसकेकोमा सरकारको आलोचना गर्नुभयो ।

नवप्रवर्तन मन्त्रालय बन्नु स्वागतयोग्य

छलफलको क्रममा उहाँले अहिलेको सरकारले विज्ञान तथा प्रविधि मन्त्रालयको नाममा नवप्रवर्तन शब्द थप गरेकोमा स्वागत गर्नुभयो ।

गत कालका सरकारले विज्ञान, प्रविधि, अझ आविष्कारको क्षेत्रमा ध्यान नदिएको सन्दर्भ उल्लेख गर्दै उहाँले यसलाई स्वागत गर्नुभयो । त्यसका साथै उहाँले सरकारको कमजोरीको पनि आलोचना गर्नुभयो ।

‘नवप्रवर्तन मन्त्रालयको साइनबोर्ड झुन्ड्याएर मात्रै हुँदैन’ उहाँले भन्नुभयो– ‘त्यसका लागि बजेट र योजना हुनुपर्दछ तर त्यसो नगरेर खाली विभाग मात्रै बनाएर सरकारले नवप्रवर्तनको क्षेत्रका ध्यान नदिएको महसुस भइरहेको छ ।’

भौतिक पूर्वाधार क्षेत्रको बजेट

भौतिक पूर्वाधारको क्षेत्रका बर्सेनि विनियोजन हुने बजेटको सन्दर्भमा त्यसको खर्च नहुने समस्यातर्फ उहाँले मन्तव्यको
क्रममा प्रश्न उठाउनुभयो ।

‘भौतिक पूर्वाधारको क्षेत्रमा विनियोजन हुने बजेट समयमै खर्च नगर्ने समस्या हामीकहाँ प्रशस्त छ’ उहाँले भन्नुभयो– ‘त्यससँगै भ्रष्टाचार, ढिलासुस्ती र अनियमिता यस मन्त्रालयका मुख्य समस्या हुन् । यसलाई रोक्नेतर्फ सरकारले गम्भीर पहलकदमी गरेको देखिन्न ।’

उहाँले यी बेथिती नरोकीकन भौतिक पूर्वाधारलगायतका क्षेत्रले अपेक्षित प्रगति गर्न नसक्ने पनि स्पष्ट पार्नुभयो ।

रोजगारीमा जोड दिनुपर्ने आवश्यकता

छलफलको क्रममा उहाँले बर्सेनि पाँच लाख युवा जनशक्ति श्रमबजारमा आउने तथ्याङ्कतर्पm उल्लेख गर्दै रोजगारी सिर्जना गर्नुपर्ने आवश्यकतामा जोड दिन सरकारसित आग्रह गर्नुभयो ।

‘प्रत्येक वर्ष पाँच लाख युवा श्रमबजारमा आउँछन्, विद्यार्थीहरू विद्यालयबाट ड्रपआउट भएर भारततर्फ रोजगारीका लागि जान्छन्‌’ उहाँले सरकारको ध्यानाकर्षण गराउनुभयो– ‘सरकारले यी युवाको रोजगारीका लागि बजेट छुट्याउन सकेको छैन ।’

महिलाको जीवनस्तर उठाउन आवश्यक

उहाँले मधेस तथा कर्णाली प्रदेशका महिलाको जीवनस्तर उठाउनमा ध्यान दिनुपर्ने बताउनुभयो ।

‘भित्री मधेसका दलित तथा जनजातिका महिलाको जीवनस्तर दयनीय छ’ उहाँले भन्नुभयो– ‘उनीहरूको जीवनस्तर उच्च बनाउने काममा सरकारले सन्तोषजनक प्रकारले काम गरेको देखिन्न ।

यसै सन्दर्भमा नेपालमा पुरुषभन्दा महिलाले बढी धूमपान गर्ने गरेकोमा उनीहरूको स्वास्थ्यप्रति बेलैमा ध्यान दिनुपर्ने बताउनुभयो ।

शिक्षा र स्वास्थ्यको कर आपत्तिजनक

बजेटमार्फत सरकारले शिक्षा र स्वास्थ्यमा कथित समानता कर लगाएकोमा सांसद विश्वकर्माले त्यसप्रति आपत्ति प्रकट गर्नुभयो ।

‘सरकारले चलचित्र हलमा लगाइएको कर मिनाहा गर्छ’ उहाँले भन्नुभयो– ‘तर अस्पताल धाउने बिरामीमा लागि समानता कर थोपरिरहेको अवस्था छ ।’

त्यस्तै उहाँले शिक्षामा कथित समानता कर लगाएर गरिब विद्यार्थी तथा अभिभावकको ढाड सेक्ने काम गरेको आरोपसमेत लगाउनुभयो ।