गोविन्दकुमार शर्मा
काठमाडौँ, असार १४ । युगज्योति प्रा.लि.का अध्यक्ष आनन्दराज शर्माले वर्तमान सरकारका प्रारम्भिक गतिविधिले प्रेस स्वतन्त्रता, नागरिक अधिकार तथा लोकतान्त्रिक उपलब्धिमाथि गम्भीर चुनौती सिर्जना गरिरहेको भन्दै सञ्चार क्षेत्र एकताबद्ध भएर संघर्षमा उत्रिनुपर्ने आवश्यकता औँल्याउनुभएको छ।
नेपाल पत्रकार महासंघ काठमाडौँ शाखाले आज पत्रकार महासङघको केन्द्रीय कार्यालय सङ्चार ग्राम, काठममाडौँमा “नेपाल पत्रकार महासंघको आन्दोलन र काठमाडौँ शाखाको भावी योजना विषयक” सम्पादक/प्रकाशकसँग अन्तरक्रिया तथा सुझाव संकलन कार्यक्रममा मन्तव्य राख्नै नेता शर्माले सो धारणा राख्नुभएको हो ।
नेपाल पत्रकार महासंघ काठमाडौं शाखाले आयोजना गरेको कार्यक्रममा बोल्दै शर्माले सरकारले छोटो अवधिमै देखाएको कार्यशैलीले मुलुकको भविष्यप्रति गम्भीर चिन्ता उत्पन्न गराएको बताउनुभयो । पत्रकारिता क्षेत्र सधैँ सरकारका गलत गतिविधिमाथि खबरदारी गर्ने लोकतन्त्रको महत्वपूर्ण आधारस्तम्भ भएकाले आगामी दिन पत्रकारका लागि पनि सहज नहुने संकेत देखिएको उहाँको भनाइ थियो।
शर्माले प्रेस स्वतन्त्रतामाथि अंकुश लगाउने, सञ्चारमाध्यमलाई आर्थिक रूपमा कमजोर पार्ने, आलोचनात्मक आवाजलाई निरुत्साहित गर्ने तथा सरकारको पक्षमा मात्रै बोल्ने प्रवृत्तिलाई प्रोत्साहन गर्ने गतिविधि बढ्दै गएको आरोप लगाउनुभयो । यस्ता कार्य लोकतान्त्रिक मूल्य–मान्यता विपरीत भएको उल्लेख गर्दै उहाँले समयमै प्रतिरोध गर्न नसके देश फाँसीवादी प्रवृत्तितर्फ उन्मुख हुन सक्ने चेतावनी दिनुभयो ।
उहाँले विश्वका विभिन्न मुलुकमा प्रेस स्वतन्त्रतामाथि दबाब बढिरहेको उल्लेख गर्दै नेपालमा पनि त्यस्तै प्रकारको अवस्था सिर्जना हुने संकेत देखिएको बताउनुभयो । लामो राजनीतिक संघर्ष, लोकतन्त्र स्थापना र नागरिक अधिकारको संरक्षणमा नेपाली पत्रकारिताले निर्वाह गरेको ऐतिहासिक भूमिकालाई कुनै पनि अवस्थामा कमजोर हुन नदिन उहाँले आग्रह गर्नुभयो ।
पत्रकारहरू व्यक्तिगत रूपमा फरक राजनीतिक आस्थासँग आबद्ध हुन सक्ने भए पनि सत्ता जसको भए पनि जनविरोधी, राष्ट्रहितविपरीत तथा लोकतन्त्रविरोधी गतिविधिमाथि निर्भीक रूपमा खबरदारी गर्नु पत्रकारिताको मूल दायित्व भएको शर्माको भनाइ थियो ।
नेपाल पत्रकार महासंघले अघि सारेका आन्दोलनका कार्यक्रमप्रति ऐक्यबद्धता जनाउँदै उहाँले प्रेस स्वतन्त्रता, सञ्चारकर्मीको हकहित तथा लोकतान्त्रिक अधिकारको रक्षाका लागि थप सशक्त आन्दोलनका कार्यक्रम घोषणा गर्न आग्रह गर्नुभयो ।
काठमाडौँ शाखाको भूमिकाले देशभरका पत्रकारलाई सकारात्मक सन्देश प्रवाह गर्न सक्ने उल्लेख गर्दै शर्माले शाखाले अझ जिम्मेवार, प्रभावकारी र नेतृत्वदायी भूमिका निर्वाह गर्नुपर्नेमा जोड दिनुभयो ।
कार्यक्रममा नेपाल पत्रकार महासंघका अध्यक्ष निर्मला शर्माको प्रमुख आतिथ्यता र काठमाडौँ शाखा अध्यक्ष शोभा आर्यालको अध्यक्षताबाट अगाडि बढेको थियो ।
कार्यक्रममा सम्पादक समाजका अध्यक्ष पुरु रिमालको विशिष्ट आतिथ्यता रहेको थियो । कार्यक्रमको सञ्चालन काठमाडौं शाखा सचिव रमेश बोहराले र स्वागत मन्तव्य हेम रानाले गर्नुभएको थियो ।
कार्यक्रममा किशोर श्रेष्ठ, राम प्रसाद दाहाल, आनन्दराज शर्मा, के.वी. सम्राट, शान्ताराम बिडारी, सूर्य सुवेदी, टंक कार्की, मदन श्रेष्ठ, दामोद प्रसाद दवाडी, डा. केशव देवकोटा, नवराज न्यौपाने, कल्पना शर्मा, रोजिना थापा, रामचन्द्र बस्नेत लगायतले आसन ग्रहण तथा सुझाव दिएका थिए ।
